Demokraatini siulittaasup Niels Thomsenip Partii Naleqqap akerliussutsimik takutitsinera pakatsissutigaa kusanaatsumik nikanarsaasumillu nipeqarmata.  Naleqqutinngitsutut oqaatigaa aamma nunarput tamaat isiginerlutsikkaat naqissuserlugu. 

”#Kolonistyre - #RejsHjem”, ”#DiktatorKim”, ”#Tunivaatigut".

- Isumaqarpunga tamanna pissusilunneruvallaartoq nunatsinnut ataqqinninnermut iluaqutaanavianngitsoq. Danskit ministeriunerat nunatsinni tikeraartoraarput aamma inuttaa oqaasiiluunniit isumaqatiginngikkaanni ataqqillugu ilumoorsaarluta pissuseqarfigisussaavarput.  Uangut kalaallit inuiaat inussiarnersutut tikilluaqqusisutullu ilisarisimaneqarpugut aamma taamaattuaannartariaqaraluarpoq. Taamaattumik pakatsivunga Partii Naleraq tapersersortaasalu tikeraartunut oqaasipilummata inussiarnisaaratillu, tusagassiutinut nalunaarummi allappoq.

Danmarkimi taama pisoqartuuppat
Nangillunilu:
- Qanorli uangut taama pineqartuugaluarutta. Assersuutigalugu Naalakkersuisut Siulittaasuat Danmarkimut tikeraartillugu Dansk Folkeparti nilliaatigaluni akerliussutsimik takutitsisuugaluarpat qanormita isumaqassagaluarpugut. Uagut kalaallit kamaammingaatsiaqqajarpugut. Eqqaamatigut allanit pineqarusunnitsitut pissusilersortassagatta. 

Neriuppoq Hans Enoksenip partiimi ilaasortamilu pissusilersornerat pakatsissutigisimassagaa. 

Isumaqatigiissutip paasiniarluaqqaarnissaa
Lars Løkke Rasmussenip aamma Kim Kielsenip isumaqatigiissutaat ima isummersorfigaa.

- Isumaqarpugut isumaqatigiissutip imaa paasiniarluaqqaartariaqartoq, oqaaseqarfigilersinnagu. Tassani pineqarput aningaasarpassuit aamma uanga nassuerutigisariaqarpara tupaallaatigigakku taama amerlatigisut isumaqatigiissut suli takunanguluunniit taama aalajangersimatigisunik isummersulereermata, Niels Thomsen oqarpoq.