Arctic Winter Games ulluni makkuni Canadami South Slavemi ingerlanneqarnerani Kalaallit Nunaat marlunnik medaaliannappoq.

Dene Gamesimik stic pull unammisutigineqarnerani sølvi bronzelu medaaliannattarineqarput.

Stick pull nukersornartoq

Unammissummi tassani eqitaq orsumik tanillugu noqqoruussutigineqartarpoq. Tassani teknikkerilluinnartuusariaqarpoq. Nukeqarlualaarnissaq uani aamma pingaaruteqarpoq.

Medaaliannattut tassaapput 14-inik ukiulik Katja Nielsen sølvinnattoq, 31-nillu ukiulik Aqqaluartaaq Julius Amossen bronzennattoq, taakku tamarmik Avannaani nunaqarfimmi Qaarsuninngaanneerput.

Pissaganartorpassuit

- Sølvinnalluni nuanneqaaq, unammigattalu pissagaqaanga, Katja Nielsen pingasunngornermi ‘hand games’-imik unamminissamut qilanaaruteqartoq Sermitsiaq.AG-mut oqarpoq.

Aqqaluartaaq Julius Amossenip unammissummi sakkortuumi taama angusarissaartiginini tupaallaatigaa:

- Soorunami unamminerit aallartinnginnerini sukataarussinissara piareersimaffigisimavara. Timersortartulli arlallit peqataapput, taamaammat medaaliannannissara naatsorsuutigisimanngikkaluarpara. Unamminerit pissaganartoqarsimaqaat, bronzennattoq oqaluttuarpoq.