Aggersaanermi allassimavoq, politikkikkut suleqatigiissitsisut nukitik katunnissaat kissaatigineqartoq.

- Siuttuusut ataatsimoorlutik suleqatigiilerput, isertukuluttumik taama allassimavoq.

Namminiilivinnissamulli sukataarussisut ataatsimoortinneqarnissaannik, paasineqarsinnaavoq. Tassanilu periarfissat marluk pingaartumik eqqarsalersitsipput. Tassaasut Partii Nunatta Qitornai imaluunniit attaviitsoq Aleqa Hammond. Hans Enoksenimmi Aleqa Hammondip Vittus Qujaukitsorli partiimi ataatsimi katersornissaat iluatsissimappagu, namminiilivinnissamut sukataarussisut taakku pingaarutilimmik inissisimalersinnaapput.

Qinersinermi tupaallatsitsineq

Aleqa Hammondilli qinigassanngortinnissaa ilumuussappat, Hans Enoksen partiimi siulittaasuusoq qineqqusaarnermi tupaallatsitsissaaq, Aleqa Hammondimi siornatigut arlalippassuarnit qinerneqartarsimavoq.

Sermitsiaq.AG-p erseqqissaatigissavaa, politikkerit pineqartut pillugu eqqarsaatersuuteqarnerit uppernarsarnissaat iluatsissimanngimmat.

Partii Naleraq Aleqa Hammondisuulli namminiilivinnissamik sukataarussusiivoq, suleqatigiilissappatali qularnanngitsumik Siumup qinersisartuinut sunniuteqassalluni. Namminiilivinnissamummi pillugu apeqqummi Kim Kielsenip kingaallassaanera Siumup qinersisartuisa ilaannit naammagineqanngilaq.

Isumaqatigiinngitsut

Hans Enoksenip Aleqa Hammondilu siornatigut attaveqaqatigiinniarnerat kipivissimavoq.

Aleqa Hammondip akerleriiffiusumik naalakkersuisuunerata nalaani, Hans Enoksen Siumumiit tunuarsimavoq.
Partiimi Naalakkersuisunullu siulittaasuusimasoq Hammondip naalakkersuisuunerata nalaani naalakkersuisoqarfimmik tunineqarsimannginnini narrujuummissutigaluguli pakatsissutigisimavaa. Aleqa Hammondilli Hans Enoksen Siumumi siulittaasutut uppisitsisimanera pissutigalugu aamma ikinngutigiinnerpaanatik.

Hammondip Enoksenillu akerleriinnerat annertungaarmat Siumumiit tunuarluni Partii Naleraq pilersippaa. Tamanna Hammondip Partii Naleqqami kissaatigineqannginneranut takussutissiivoq. Taamaattoq taamanikkumiit allannguisoqangaatsiarsimavoq.

Pingaartumik namminiilivinnissamut apeqqut pillugu, taakku isumaqatigiissutigaat namminiilivinnissaq sukkanerusumik ingerlasariaqartoq.

Enoksen aamma Kielsen

Aammattaaq Enoksen Kielsenilu attaveqaqatigiinniapiloorput. Hammond Partii Naleqqami suleqatigalugu partii ilaasortaatitaminik amerleriaateqarsinnaalluarpoq. Aleqa Hammond Kuupik Kleistimut ajugaanermini inunnit qinerneqarnerpaasimavoq. Folketingimulli qinersinermi aamma arlalinnit qinerneqarluni.

Taassuma piliarisimasai uissuumminartut kinguneqarsinnaanerat 
apeqqutaalluinnarpoq. Folketinngimulli qinersinermi taama pisoqanngilaq, ukiullu sisamat missaanni ilaasortaanngereerluni,
isumaqatigiinngissutaasut pillugit aaqqiisinnaangunik siunissamullu takorluukkanik aallussisinnaagunik, taanna Hans Enoksenimut iluaqutaalluarsinnaavoq.

Enoksen/Vittus

Hans Enoksenip Vittus Qujaukitsoq suleqatigilissappagu, Partii Naleqqamut aamma nukittorsaataassaaq. Enoksenimi unammillertaarutissaaq.