- Tysklandimi inatsisartoqarfik Deutsche Bundestag Tysklandimi sumiiffiit akimanersaraat, tamaanilu nittarsaassinissamut periarfissiisoqarsinnaanngikkaluarpoq. Uagulli aalisakkanik qalerualinnullu tunngatillugu suleqatigisavut Transgourmet aamma inatsisartoqarfimmut nerisassanik pilersuisartut Dussmann "Kalaallit Nunannit sammisaqartitsineq"-tut taasatsinnik ima soqutiginnilersissimatigaavut allaat inatsisartoqarfimmi nittarsaassinissatsinnut iluatsitsilluta periarfissaqalersinnaasimalluta, René Stahlhofen Royal Greenlandip Bremenimi tuniniaasarfittut allaffeqarfiani pisortaq unnersiorpoq.

Soqutiginnittut 1600-t missaanniittut Royal Greenlandip tunisassiaminik Berlinimi inatsisartoqarfimmi nittarsaassineranut ullormut ussagartarput, ussassaariffimmilu nerisassat uttugassat arfinillit ullut tamaasa sassaalliutigineqartarput. Nittarsaassiffik suliffeqarfiup tunisassiaanik aammalu suminngaanneerfianit Kalaallit Nunaanni pinngortitarsuarmit angisoorsuarnik assiliartalersugaallunilu allagartarsualersugaasimavoq.

Kalaallit Nunaat soqutineqarpoq

- Aalisakkanik tunisassianut nittarsaassinermut tunngatillugu ussagartut soqutiginnipput, taamaattorli "Aalisakkat Kalaallit Nunaanneersut" pillugit nittarsaassineq soqutigineqartorujussuuvoq. Amerlasuut aamma Kalaallit Nunaat, aalisarneq, aalisakkat pissuseqatigiiaat aammalu nerisassiatut ilitsersuusiavut pillugut paaserusutaqarput. Ussagartut suleqatigisattalu Dussmannimeersut aamma Transgourmetmeersut soqutiginnillutik qisuariaataat aallaavigalugit taamatut nittarsaasseqqikkusulersippaatigut. Nittarsaassineq taamaattoq uagutsinnut Royal Greenlandimeersunut Tysklandimi pilersuinermi salliunniarnissamut sakkussatsialaavoq. René Stahlhofen naliliivoq.

Malik Hegelund Olsen Kalaallit Nunaanni tunisassianik tuniniaasarfimmi ingerlatsisuusoq nittarsaassinissamut qaaqqusaasimavoq.

- Nittarsaassinermi iliuutsit periutsillu assigiinngitsut peqataaffigineri malinnaaffiginerilu ilinniarfigalugillu isumassarsiorfigaakka. Ilikkakkat paasisallu tunngavigalugit nittarsaassineq uagut nunatsinnut tulluarsarsinnaavarput, Malik Hegelund Olsen oqarpoq.

Nittarsaassinermi Kalaallit Nunaat pillugu soqutiginartunik paasissutissarpassuaqarpoq. Paasissutissiilluni allagartaliaq tunisassianik nunatsinneersunik ulikkaartoq sapaatip akunnerani nittarsaassinermi immikkut suliarineqarsimavoq. Ussagartullu mobiilitik atorlugit tunisassiat titarnilersuutaannik seqersitsillutik Kalaallit Nunaanni ulluinnarni inooriaaseq pillugu paasisaqarsinnaasimapput.