Erngup nukinganik ukiuni 25-ni nukissiuteqarneq nalliuttorsiutigineqassaaq, tassani oktoberip ulluisa aallaqqaataani ullup nalliussivissap tungaanut assigiinngitsunik aaqqissuussinikkut, nutaarsiassatigut unammisitsisarnikkullu nalliuttorsiorneq malunnartinneqassaaq.

- Erngup nukinganik nukissiornermut aningaasaliinerit tamatsinnut avatangiisitigut aningaasaqarnikkullu assut iluaqutaasimanerat paasinarsisimavoq. Tamatumalu nalliuttorsiutiginissaanut kikkut tamaasa qaaqqorusuppakka. Ukiut 25-t matuma siorna siunnerfigisimasarput nangissavarput, sulilu annertunerusumik erngup nukinga nukissallu ataavartut atussallutigit, Inuussutissarsiornermut Nukissiuuteqarnermullu Naalakkersuisoq Aqqalu Jerimiassen tusagassiutinut nalunaarummi oqarpoq.

- Ullumikkut tallimanik erngup nukinganik nukissiorfeqarpugut illoqarfinnik arfinilinnik pilersuisuusunik – sulili angusassaqarpugut. 2030-ip tungaanut Nukissiorfiit erngup nukinganut nukinnullu ataavartunut allanut, soorlu seqerngup anorillu nukinginut aningaasaliisarumaarput, Aqqalu Jerimiassen oqarpoq.

Erngup nukinganik nukissiuuteqarluni ukiunik 25-nik nalliuttorsiornissamut kikkut tamaasa Inuussutissarsiornermut Nukissiuuteqarnermullu Naalakkersuisup Aqqalu Jerimiassenip ulloq 30. september 2018-imi qaaqquai. Tamanna Nuup qeqqani katersortarfimmi pissaaq, ulloq nalliussillugu kaffimik kagemillu sassaallertoqassaaq, aammalu meeqqanut inersimasunullu aliikkusersuisoqassalluni.

Kangerluarsunnguami nukissiorfik pillugu filmiliaq naatsoq nutaaq ulloq 28. august 2018-imit ullup nalliuttorsiorfissap tungaanut Nuuk Lokalmuseumip takutissavaa. Tamanna unnukkut aaqqissuussinikkut aallartinneqassaaq, Nukissiorfinni teknikkimut tunngasunik pisortaq Mogens Nielsen, aamma nukissiorfimmi sulisut erngup nukinganik nukissiorneq aamma nukissaq ataavartoq pillugit oqaluttuassallutik.

Septemberip ulluisa 22 aamma 23-ianni 2018, sapaatit akunnerata naanerani Kangerluarsunnguami nukissiorfik ammarneqarpat iluaniit takornariarneqarsinnaalissaaq, sulisullu nukissiorfimmi takornariartitsissapput.