Nukissiorfiit ilaatigut imeqarnermik akisussaasut, ingerlatseqatigiiffiup Uummannami imissap misissoqqissaarneqarneranik aallartitsisimallutik, tusagassiuutinut nalunaarummi ilisimatitsissutigat.

Ikuallattup annertuumik Uummannami imeqarfiup tungaanut pujornerata kingorna tamanna pivoq, KNR-ip allaaserisaa naapertorlugu eqqaavissuaq ikuallassimavoq.

- Maannakkorpiaq nalileruminaappoq imermik isumalluutaasumik mingutsitsisoqarsimanersoq. Nukissiorfiit siusinnerusukkut oqartussaasunut attuumassuteqartunut saaffiginnissimapput, eqqaavissuarmi ikuallassaasarnerup kingunerisaanik erngup imerneqartussap mingutsinneqarsinnaaneranut aarlerinaateqarsinnaaneranut tunngatillugu, Nukissiorfiit allapput.

Nukissiorfiit pisup kingunerisaanik imermik misissugassanik qalusititsivoq, tassalu tappiorannartoqarnersoq aamma akuutissanik akoqarnersoq misissorneqassaaq. Tamanna oqartussaasut attuumassuteqartut pisoq pillugu ilisimatinneqareersimasut, qanimut suleqatigalugit ingerlanneqarpoq.

- Nukissiorfiit tamatumunnga ilutigitillugu ilisimatitsissutigissavaa suliffeqarfik februaari 2018-imi Avannaata Kommuniata tusarniaassuteqarneranut akissuteqarsimagami, Uummannami nunap qaavani eqqakkanik ikuallaasarnermik immikkut akuersissuteqarnissamut qinnuteqaateqarneranut tunngatillugu. Tassani pingaartinneqarpoq ikuallaasoqassappat, taava tamanna pissutsinik nakkutiginnilluni ingerlanneqartariaqartoq, tatsit imermik imerneqartussamik imeqarfiusut aamma imeqarfiit tikinneqaqqusaannginnerannut killiliussat anorip sammivia taakkununnga sammissanngitsoq, Nukissiorfiit nalunaaruteqarput.