Yachtip ‘’Ice Angel’’-ip ikkarlinnermini umiarsualiviup aamma piffimmi mingutsitsineranik ernumassuteqarneq tunngavissaqanngilaq, tusarfiit arlallit Sermitsiaq.AG-mut nassuiaapput.

Ikkarlinneq

Septembarip 7-anni umiarsuaq nalunaaqutaq 21.00 missaani ikkarlippoq, ilaasullu 15-it umiatsianukartariaqarsimapput.

Issittumi sakkutooqarfik kalerrisaarneqarpoq, taassumalu pisoq assiliortorniarlugu uuliakoortoqarnersorlu paasiniarlugu timmisartoq Challengeri Kangerlussuarmit aallartippaa.

”Ice Angel”, angummit pisuumit Monacomeersumit pigineqartoq, ajutoornerup kingorna Nanortalimmut kalinneqarpoq, upalungaarsimasullu kingorna assersuipput aamma tankit imaarneqarput. Yachti timitamigut ikkarlinnermini putusimasoq aqqartartut paasivaat.

Amutsivimmut angallanneqassasoq

Politiinit suliassaanngitsoq, Nanortalimmi politiit ilisimatitsipput. Imarsiornermik Aqutsisoqarfik suliami ilannguneqarpoq, taamatullu aamma umiarsuup sillimmasiisarfia.

”Ice Angel”-ip umiarsuarmut allamut anginerusumut ikillugu amutsiviliaanneqarnissaa pilersaarutaavoq.

Ikkarlinnermi inunnik ajoqusertoqanngilaq, Nanortalimmilu politiit ilisimatitsissutigaat, ikkarluk immap assingani nalunaarsorneqarsimanngitsoq. Yachti akiliisunik ilaasoqanngimmat ilisimasortaqarnissaq pisariaqarsimanngilaq.

Pasilliut tunngavissaqanngitsoq

Yachtip ikummatissamik umiarsualivimmi maqittoorneranik innuttaasut pasilliuteqarlutik ajutoornerup kingorna innuttaasut arlallit politiinut saaffiginnittarsimapput. Kisianni pinerit tamaasa yachti pissutaanngitsoq upalungaarsimasut paasisarpaat. Illuanik aalisartut mianersunnginnerisa kingunerisaanik ilaatigut umiarsualiviup eqqaani immami ikummatissamik takussaasoqarneranut pissutaasinnaasoq.

Yachti “Ice Angel” pillugu paasisaqarnerugit