Aasaanerani nalunaaquttap nikittarnera allanngorneqassanngilaq
Partiit annerpaartaasa marluk Per Rosing-Petersenip siunnersuutaa itigartippaat
Aasaanerani nalunaaquttap nikittarnera Siumup aamma Inuit Ataqatigiit allanngortinnissaat kissaatiginngilaat.
Taakku partiit marluk Inatsisartut Inatsisinut Ataatsimiititaliaani attaviitsup Per Rosing-Petersenip aaqqiissutip peerneqarnissaanut siunnersuutaa itigartippaat.
Atuaruk: Per Rosing-Petersen: Nalunaaquttap nikittarnera atorunnaarsinneqarli
Peqqissutsimmut ulorianartorsiortitsinngitsoq
Kalaallit Nunaanni aasaanerani nalunaaquttap nikittarnera tulluanngitsoq, Per Rosing-Petersenip siunnersuummini erseqqissarnikuuaa.
Inatsisinut Ataatsimiititaliap EU-mi Kommissionip sammisaq pillugu nalunaarusiaa atuarsimavaat. Nalunaarusiami ilaatigut atuarneqarsinnaavoq 'aasaanerani nalunaaquttamik nikisitsisarnermik aaqqissuussinerup peqqissutsikkut ulorianartorsiortitsinernik nassataqartarnera kommissionip isummernera malillugu uppernarsarneqanngitsoq.'
Inatsisinut Ataatsimiititaliami amerlanerussuteqartut nalunaarusiami inerniliussaq isumaqatigaat. Taamaalillunilu aasaanerani nalunaaquttap nikittarnera allanngortinneqassanngilaq.