Aasivissuit-Nipisat UNESCO-p Nunarsuarmi kingornussanut eriagisarialinnut ilannguppoq
Kalaallit Nunaata qeqqani kulturikkut eriagisassaq Aasivissuit-Nipisat UNESCO-p nunarsuarmi kingornussassatut allattorsimaffianut ilanngunneqaqqammerpoq. Eriagisassanngortitaq immikkuullarissumik kulturitsinnik nunaminertalik sermersuarmit tuttoqarfissuatigut silammut kangerlunnut qeqertanullu qanga nunaqarfiusimasunut.
Nunani allani eriagisassanngortitat soorlu Vadehavet, Vatikanstaten, Thingvellir National Park, Laponia, minnerunngitsumillu Ilulissat Isfjord Nunattalu Kujataa Aasivissuit-Nipisat eriagisassanngortinneqarpoq.
Namminersorlutik Oqartussat tusagassiuutinut nalunaarummi taama ilisimatitsipput.
Eriagisassatut kingornussarsiaritita pingasunngorput
Kultureqarnermut Naalakkersuisup Vivian Motzfeldt-ip Nunarsuarmi eriagisassatut innersuunneqartut akuersisartuinit nuannersumik nalunaarfigineqarpoq qinnuteqaat akuerineqartoq.
UNESCO-p eriagisassatut kingornussarsiarititai Nunatsinni taamaalilluni pingasunngorput, kultureqarnermullu Naalakkersuisup Vivian Motzfeldtip neriuutigaa nunarsuarmioqatitsinnit akuersaarneqarnermik kinguneqarluni nunatta ilorraap tungaanut ingerlaneranut tapertaajumaartoq. Kultureqarnermullu Naalakkersuisup nunarsuarmioqatigiit ataatsimoorussanik ingerlatsilerneri suleqatigiinnikkut annertusarneqassasoq neriuutigaattaaq.
Sivisuumik suliarineqartartoq
Kingornussassanik qinnuteqaatit sivisuumik misissueqqissaarnerillu aqqusaareerlugit ingerlanneqartarput. Qinnuteqaasiorneq ukiuni arlalissuarni immikkut ilisimasallit, Qeqqata Kommunia, Danmarkimi Slots- og Kulturstyrelsen Nunatsinnilu Nammisorlutik Oqartussat Aasivissuit-Nipisat pillugit nalunaarusioreerlutik piffinnik allannik naleqqersuereerlutik nalisissaanngitsutut naqissuserneqarpoq. Ilagitillugu innuttaasut pineqartumi ilisimasallit akuersinissamut tapertaasimapput, qinnuteqaateqarnermut iluaqutaaqalutik.
Aasivissuit-Nipisat: Inuit Hunting Ground between Ice and Sea siuligut ukiut 2500 kristusip inunngornera sioqqulluguli inoqareersimasup uppernarsisippaa pinngortitamik atorluaasimanermik. Illukut takutippaattaaq nunasiaalernerup nalaani 1700-kkunni nunap inuii inooqatigisarsimagaat.
Suli piniarfiusartoq
Sumiiffik ullumikkut aavarfittut atorneqarpoq, tupersuaqarfikullu suli atugarineqarlutik, taamaalilluni siulinik kingornussat atorluarneqarput. Kitaani inuit inusaarsimarannik ukiut 4.500-t uppernarsaatissalerlugit taamaalilluni Aasivissuit-Nipisat naqissuserneqarput.
Aasivissuit – Nipisat: Inuit Hunting Ground between Ice and Sea pillugu atuarnerugit: Una tooruk
Slots – og Kulturstyrelsen aamma atuaruk
Naalagaaffeqatigiit Naalagaaffiit Peqatigiit Nunarsuarmi kingornussanut eriagisassai pillugit atuarnerugit: Una tooruk
