Alianartoq: Islandimi nunap sajunnerani ajunaartoq siulleq
Islandimi illoqarfimmi Grindavíkimi nunap sajunnerani angutip ataatsip ajunaarnera aarlerigineqarpoq, tamannalu illoqarfimmi najugaqartut akornanni toqqissisimannginnermik kinguneqarpoq.
Novembarimi illoqarfik Grindavík nunap sajunneranit eqqorneqarpoq, tamatumalu kingunerisaanik illoqarfiup eqqaani itisuunik quppaqalersimavoq.
Grindavíkimi borgmesteri Fannar Jónasson Islandimi tusagassiorfimmut Visir-imut oqarpoq, qupparsuaq matuniarlugu naammassiniaanermi alianartumik pisoqarnera pisimasoq. Suliaq naammassingajalermat quppaq immerneqarsimasoq naqittarneqarpoq. Taamaakkaluartoq tassanngaannaq nuna uppikarsimavoq, nunalu itisumut nakkariataarpoq angut nakkartillugu.
Sialussuarneq
Annaassiniartartut ulluni arlalinni annaassiniarsimapput, unnuarli siallerujussuarnera annaassiniarnermik ajornakusoortitsivoq, tamannalu pissutigalugu unitsittariaqarsimapput.
Illoqarfimmi ajunaarnersuaqarfiusumi, novembarimi nunap sajunnerata kingorna illut aqquserngillu arlallit aserorsimaffianni, iluarsaaqqinnerit tamarmik maannamut unitsinneqartut, borgmesteri oqarpoq.
- Pisimasoq soorunami annilaarnartorujussuuvoq alianartorujussuullunilu, inuillu nunap sajunnerani aserorsimasunut qanilliumannginnissaannik kajumissaarpavut, borgmesteri Visirimut oqarpoq.
Ajutoorneq tamanna Grindavíkimiunut qimarnguffiusumut uterusuttunut kingunerlutsitsivoq.
