Amerikamiut Kalaalllit Airportsimut taarsigassarsisitsisussatut ilimanarnerpaasut
Nuummi Ilulissanilu mittarfiit 1,5 milliarder koruuninut tallineqarnissaannut atatillugu Namminersorlutik Oqartussat mittarfiutileqatigiiffiata Kalaallit Airportsip siulittaasuata Jóhannes Egholm Hansenip Amerikami soraarnerussutisiaqalernissamut aningaasaateqarfinnit akikitsumik taarsigassarsiniarnissartik siunniuppaa.
Nuummi Ilulissanilu mittarfiit ukiuni qaninnerpaani 3 milliarder koruuninut allineqassapput, siunissami Europami Amerikamilu Avannarlermi mittarfinnit takornarianik angalasunillu allanik amerlanerujussuarnik, toqqaannartumik tikisitsisalernissaq siunertaralugu.
Aningaasalissutissat affaat namminersorlutik oqartussat mittarfiutileqatigiiffiata Kalaallit Airportsip nunani tamalaani taarsigassarsiniartarfinnit pissarsiariniarniarpai. Ingerlatseqatigiiffilli aningaasaqarnikkut siunnersortini peqatigalugit aningaasaliisartuni taarsigassarsiffigineqarsinnaasunik misissuilinngitsorluunniit sulilu isumaqatigiinniuteqalinngitsorluunniit takuneqarsinnaalereerpoq Kalaallit Airportsip Danmarkimi soraarnerussutisiaqalernissamut aningaasaateqarfiit toqqarunanngikkai.
Piumasaqaatit annertuut
Paasisaqarfiit arlallit naapertorlugit Danmarkimi soraarnerussutisiaqalernissamut aningaasaateqarfiit taarsigassarsisitsissagunik ukiumut iluanaarutissamissut piumasaqaataat ima annertutigaat, Kalaallit Airportsip isumaa naapertorlugu Amerikami soraarnerussutisiaqalernissamut aningaasaateqarfiit akikinnerujussuit orniginarnerullutik.
Taamaasilluni Nuummi Ilulissanilu mittarfiit tallineqarnissaannut atorneqartussat ilaat 1,5 milliarder koruunit missaanniittut, nunatta mittarfiutileqatigiiffiata nunani tamalaani taarsigassarsiniartarfinnit taarsigassarsiariniagai, Amerikarmi soraarnerussutisiaqalernissamut aningaasaateqarfinnit taarsigassarsiariniarneqassasut ilimanaateqalerpoq.
Tamanna pillugu Sermitsiami paasisaqarnerugit. Uani ataani aviisimut isissutissarsigit: