Angut assammik arsarlutik nunanut allanut unammisartut VM-imut anngunniunnissaannut piareersarnerit nangeqqinneqarput. Assammik arsartartut kattuffiat TAAK tusagassiorfinnut taama nalunaaruteqarpoq.

Angutit nunanut allanut unammisartut Ikastimi 18.-23. januar katersuutissapput.

Nunanut allanut unammisartut 25-t Nuummi siorna katersuutereersimapput. Ikastimilu katersuunnissami unammisartut 19-it peqataasussanngorput.

- Nuummi oktoberimi katersuunneq iluatsilluarpoq. Sungiusaasutut pisortatigoortumik suliassanni siulliusimavoq, taamaammallu nunanut allanut unammisartut isumassarsiakka pillugit eqqartueqatigisimavakka.

Isumassarsiat misilerarneqarput

- Maanna misilerarneqartussanngorput, tamatumuuna sumiiffimmi allami, kiisalu marloriarluta sungiusaatigalugu unammissalluta. Tamanna pisariaqarpoq VM-imut anngunniunnissamut maajimi pisussamut piareersarnitsinnut, angutit assammik arsarlutik nunanut allanut unammisartut sungiusaasuat, Johannes Groth tusagassiorfinnut nalunaarummi oqarpoq.

VM-imut anngunniunnissat sumi ingerlanneqassanersut suli inissinneqanngilaq. Sumiiffissaq qaammatit marluk ingerlaneranni nalunaarutigineqarnissaa naatsorsuutigineqarpoq.

Angutit assammik arsarlutik nunanut allanut unammisartut pingasoriarlutik VM-eqataasimapput, kingullermik 2007-imi.