Assammik arsarneq: U16-it GM-erneranni siullermi Nuummiut kuultinnapput
Sapaatip-akunnerata siuliani nunatsinni U16-it assammik arsarlutik pissartanngorniunnerat siulleq Ilulissani ingerlanneqarpoq. Tassani GSS-ip niviarsiarartai aamma NÛK-p nukappiarartai kuultinnapput.
U16-it assammik arsarlutik pissartanngorniunneranni siullermi ataasinngornermi februaarip 26-aniit iligiit tallimat nukappiaqqani niviarsiaqqanilu peqataapput.
Tassani GSS-ip niviarsiaqqani unammisartui NÛK-llu nukappiaqqani unammisartui unamminerit pissanganarsimasut kingorna ajugaapput, taamaalillutillu kuultinnallutik.
Ilulissani pissartanngorniuttoqarmat Nagdlúnguaq 1948 aaqqissuisuusimavoq.
- Unamminerit ataatsimut isigalugit, unamminerit siulliit arsartunut
pissanganartarsimasut malunnarpoq. Aallartilluaramilli sukkatsikkiartorneri sakkortusiartornerilu malunnartumik ersittalerpoq, assammik arsartartut kattuffiat TAAK, tusagassiuutinut nalunaarummi taama allappoq.
Siunissamut isumallualersitsisut
Niviarsiaqqat nukappiaqqallu finalimi unamminerminni målimik ataasiinnarmik nikingapput.
- Holdit sisamat tamarmik naligiilluinnarnerat ujaminnanniunnerni malunnarpoq. Pingaartumik pissartanngorniunnerni finalini marlunni kuultinnattut "taamaallaat" målimik ataatsimik ajugaapput. Tamanna inuusuttut pissartanngorniunnerini ukiorpassuarni takuneqarsimanngilaq. Tamanna siunissamut isumallualersitsivoq, TAAK-imit oqaatigineqarpoq.
Niviarsiaqqat inissinneri:
1. GSS, Nuuk
2. SAK, Sisimiut
3. Akuleriit Kujataa
4. Akuleriit Avannaa
5. NÛK, Nuuk
Nukappiaqqat inissinneri:
1. NÛK, Nuuk
2. GSS, Nuuk
3. SAK, Sisimiut
4. Nagtoralik, Paamiut
5. Akuleriit
