Ukrainemi sorsunneq pissutigalugu Ruslandimi præsidenti Vladimir Putin pissaanikinnerulerpoq.

Taama allappoq USA-mi CIA-mi pisortaq William Burns aviisimi Foreign Affairs-imi allaaserisami.

Naak Putin qanittukkut Ruslandimi pissaaneqarunnaarnissaa ilimananngikkaluartoq, nunap siuttuini innuttaasuinilu præsidentimik naammaginninnginnerup siaruaakkiartulernera malunnarpoq, Burns allappoq.

CIA-p pisortaa naapertorlugu tamanna CIA-p alapernaarsuiartortitat amerlanerusut pissarsiarinissaannut iluaqutigisimavaa.

Sulisussarsiornissamut periarfissaq asseqanngitsoq

Naalagaaffiup isertortumik paasiniaasui piffissami kingullermi russit paasissutissanik CIA-mut tunniussinissaannut kajumissaarlugit videoliat arlallit saqqummiuppaat, Putinimik naammaginninnginnermut toqqaannartumik innersuussuteqarlutik.

- Naammagittaalliorneq CIA-p sulisussarsiornissamut periarfissatut immikkorluinnaq ittutut isigaa. Tamanna asiutissanngilarput, Burns allappoq.

CIA-p pisortaata aamma Putinip 2023-mi, sakkutuut namminersortut Wagnerip peqatigiiffiata Ruslandimi sakkutooqarnermut aqutsisunut pikitsitsinerata kingorna, nalorninartorsiornera innersuussutigaa.

Sakkutuut Ruslandi sinnerlugu Ukrainemut, Putinip februaarimi 2022-mi tiguarneqarnissaanut peqqussutaanut, aallartinneqarnernerminni pissutsit naammaginngilluinnarpaat.

Pikitsitsinerli unitsinneqarpoq naalakkersuisut sakkutuullu isumaqatigiissuteqarmata. Pikitsitsinermi siulersuisoq Jevgenij Prigozjin, maanna toqukkut qimagutereersoq, sivitsunngitsoq timmisartup nakkarnerani ajunaarpoq, Ruslandi pisuusorineqarluni.

Aningaasaqarneq ajoquserneqarluinnarpoq

Burns naapertorlugu Prigozjinip toqunerata Ruslandimi isornartorsiuisartut nipangersinngilaat — ingammillu isertortumik.

Burns naapertorlugu Ruslandip sakkutooqarnikkut tunisassiornini ineriartorteqqissimavaa, aningaasaqarnerali sorsunnerup kingunerisaanik ajoquserneqarluinnarpoq. Ruslandip piffissaq ungasinnerusoq eqqarsaatigalugu Kinatut naalagaaffittut naalatsigititatut inuunissaa pinngitsoorpoq, allappoq.

Aamma CIA-p pisortaa allappoq Kitaamiut USA-llu Ukrainemik tapersersuiuarnissaat pingaaruteqartoq. Ingammik USA-mi Republikanerit tapersersuineq isornartorsiornerulerpaat.

Burns allappoq atomimik sakkussiat atorlugit sorsunnerup ingasatsikkaluttuinnarnissaanik ernumassut pissutissaqartoq, ingasaassinianngitsumilli.

- Putin atomimik sakkussiaminik atueqqilersinnaavoq, sakkortunerulernissaallu ilimanannginnerarluinnarneqassappat sianiilliornerussaaq, pisariaqanngitsumilli annilaangalerneq taamatulli sianiilliornerussaaq, allappoq.