USA-p sakkutuuisa timmisartui pingasut ikiuutinik siullernik Gazap immikkoortortaanut nakkartitsipput.

USA-mi atorfillit marluk atiminnik oqaatiginninngitsut nutaarsiassaqartitsivimmut Reutersimut taama oqarput.

Paasissutissat ilaat naapertorlugu nerisassat 35.000-it sinnerlugit taamaalillutik Gazami Palæstinamiunut nassiunneqarput.

USA-mit nassiussat siulliit imermik nakorsaatinillu imaqanngillat.

USA taamaaliornikkut ikiuutinik aallartitsisalernissamik Joe Bidenip nalunaaruteqarnerata aqaguani nakkartitsineq pivoq.

Tallimanngormat tusagassiortunik katersortitsinermi Palæstinami ikiuiniarnerit naammanngilluinnartut erseqqissarpaa.

Frankrigip Tuluillu Nunaata Jordanip silaannakkut sakkutuui suleqatigalugit Gazamut ikiuutinik nassiussisareerput.

Canadami naalakkersuisut aamma taakkununnga assingusumik pilersaaruteqarlutik sisamanngormat nalunaarput. 

Nerisassanik, imermik, nakorsaatinik pisariaqartitanillu allanik Gazap imartaaniit umiarsuarmik assartuisoqarsinnaaqqullugu aqqutip ammarnissaa USA-p aamma sulissutigaa.

Tallimanngormat unnukkut tusagassiortunik katersortitsinermi Det Hvide Husip oqaaseqartartua John Kirby taama oqarpoq.

Ikiuissutit Gazamut apuunneqarniassammata "Israeli lastbiilinik amerlanerusunik aqqutinillu amerlanerusunik ammaasseqqullugu" USA-p suli kimigiiserfigigaa, Kirby oqarpoq.

Oqarpoq sisamanngormat Palæstinamiorpassuit 100-nit amerlanerusut lastbilit ikiuiniaqatigiit ornillugit katersuussimasut toqutaanerannit allatut aaqqiissuteqarnissaq pisariaqartoq ersertoq, ikiuiniaqatigiit apuuffissaminnut apuussinnaaniassammata.

Gazami pissutsit ilungersunarput. Innuttaasut minnerpaamik sisamararterutaat perleqqajaapput, FN-ip inunnik ikiuiniarnermut ataqatigiissaarisua, OCHA, oqarpoq.

Ingammik Gazap avannaani nerisassat, nakorsaatit imerlu minguitsoq pisariaqartinneqarput.

Sumiiffimmi Hamasimit aqunneqartumi pissutsit ajorsiartuinnartut qaammatini arlalinni ikiuiniaqatigiiffiit mianersoqqusipput.

Gazami Palæstinamiut uumasunut nerukkaatit inuuinnarniarlutik nerisaraat kingullertigut arlalinnit nalunaarutigineqarpoq.

Palæstinami nakorsat naapertorlugit meeqqat Gazap immikkoortuani napparsimmavinniittut panertooriartorneq peqqinnanngitsumillu nerisaqarneq pissutigalugit toqusarput.

Ikiuiniarnermi „ajornartorsiutit qaangerneqarsinnaanngitsut“ FN-ip nalunaarutigaa.

Amerikamiut sakkutuuisa timmisartui pingasut arfininngormat Gazap ilaanut nerisassanik assartuisut C-130-upput.

/ritzau/Reuters