GM-imi arsallammak: Toqqarneqarnissara naatsorsuutigisimanngikkaluarpara
B-67-mi arsaattartoq GM-ertoqarnerani arsallammattut toqqarneqarpoq
24-nik Patrick Otiri Frederiksen arsaalluni Nunatsinni pissartanngorniuttoqarnerani arsallammattut toqqagaasoq Sermitsiaq.AG-mit apersorneqarpoq.
Nagdlunguak' 2-0-mik ajugaaffigereerlugu B-67 Nunatsinni pissartanngorpoq sapaatiummat.
Ukioq naallugu sungiusarneq
- Ukioq kingulleq sølvinnareernitta kingorna pissartanngornissarput anguniarlugu ukioq naallugu sungiusarpugut. Arsaaffimmi sungiusarnerit kiisalu timigissartarfimmi akunnerpassuit atorpagut, tassani nukittorsarneq qasujaallisarnerlu pingaartillugit sungiusartarlugit, Patrick Otiri Frederiksen, midtbanemi arsaattartuusoq, oqarpoq.
Pissartanngorniunnermi arsaannini naammagisimaarluarlugu oqarpoq.
- GM-imi toqqakkanut aamma pissartanngornissarput anguniarlugu peqataavunga. GM-ertoqarnerani holditsinnut tapiilluarsimallunga misigaanga, arsallammattulli toqqarneqarnissara naatsorsuutigisimanngilara, arsaatillaqqissorsuaqarpormi, taamaattumik toqqarneqarnera tulluusimaarutigaara, GM-ertoqarnerani pingasoriarluni isertitsisoq oqarpoq.
Pissartanngoqqinnissaq anguniarpaa
GM-imi pissartanngoqataaqqinnissani taamaasilluni siunnerfigilereerpaa.
- GM-ertoqarnera puigunaappoq, tassami aatsaat taama unammisaqattaarluartigaagut. Ataqatigiilluartorujussuuvugut holdip iluani, aamma pitsanngoqqittuarnissarput anguniartuaannarparput. Maanna sungiusaasorisimasarput, Tekle Ghebrelul, uagutsinnut piumasaqaateqartorujussuunikuuvoq, tassani peqqissuunissaq unammisatsinnullu ataqqinninnissaq pingaartinneqarluni. Assersuutigalugu nerisagut paarinikuuagut, imigassartornata, pujortarnata sukkutornaveersaarlutalu, Patrick Otiri Frederiksen oqarpoq.
- Holditsinni aqutsisunngorusuppunga, anførinngorusullungalu, kiisalu ineriartortuarnissarput aamma aallutiinnarusullugu, Patrick Otiri Frederiksen, maanna pingasunik silami guldtinnaqataasoq kiisalu futsalimi ataatsimik guldtiuteqartoq, oqarpoq.
