Terianniaq pissusissarinngisaminik pissusilersortoq Ilulissani tallimanngornermi ullaap tungaani takuneqarsimavoq. Uumasunut Nakorsaqarfik Inuussutissalerinermullu Oqartussaqarfik terianniaq pillugu ilisimatinneqarsimavoq, terianniarlu perlerorsorineqarpoq.

Oqartussat ilisimatitsipput terianniaq ullumi toqunneqarsimasoq.

- Uumasoq perlerulersimaguni qisimigut viruseqalersarpoq, taannalu kiisinermigut tunillaasinnaavoq imaluunniit assaat ikeqarpata attuunnerisigut tunillaasinnaalluni. Uumasoq tunillatsissimasoq perlerornermik nappaammik ersiuteqanngikkaluarluni sapaatip akunneri arlallit tunillaassuisinnaavoq.

Perlerorneq virusimik nappaataavoq Kalaallillu Nunaanni terianniat akornanni nappaatigineqakkajuttoq. Terianniat qimminut qitsunnullu toqqaannarlugu attuisimagunik nappaammik tunillaasinnaapput, taakkualu inunnik tunillaasinnaallutik. Tunillatsissimasut pitsaaliuinermi malitassanik malinninnissaat pingaaruteqartoq, oqartussat tusagassiorfinnut nalunaaruteqarlutik allapput.

- Inuk terianniamik kiitissimaguni, piaarnerpaamik imermik qaqorsaaserlugu salinneqassaaq erngiinnarlu peqqinnissaqarfik attavigineqassalluni.

Qimmit terianniamit qaninngarneqarsimasut

Uumasunut Nakorsaqarfik Inuussutissalerinermullu Oqartussaqarfik ilisimatitsivoq qimmit arlallit terianniamik paannissimasut ilisimasaqarfigalugit.

- Qimminik teriannianik ulluni qaninnerni paannittunik takunnittoqarsimaguni imaluunniit qimmit teriannianut attaveqarsimaneranik pasitsaassisoqarsimaguni ingerlaannartumik Kalaallit Nunaanni Uumasunut Nakorsaqarfik Inuussutissalerinermullu Oqartussaqarfik attavigineqassaaq, taamaalilluni Kalaallit Nunaanni Uumasunut Nakorsaqarfik Inuussutissalerinermullu Oqartussaqarfik iliuuseqarsinnaalissalluni, oqartussaqarfik ilisimatitsivoq.

Qimmit tunillatsissimagunik uku ersiutigisinnaasarpaat:

• tassanngaannaq kamassarissisarpat
• sakkortuumik kumittarpat
• nuakoorpat
• kamassarissusia allanngorarpat
• saassusserusuppat
• iisiniarnermik ajornartorsiuteqarpat
• pissusissamisuunngitsumik eqqissiviippat
• takusorisaminut kiiseriartarpat
• nujuarpat
• tamakkiisumik ilaannakortumilluunniit nukillaartalersimappat pingaartumik alleqqumigut uppatimigullu
• niaqquni pissusissarinngisaminik inissittarpagu

Kalaallit Nunaanni Uumasunut Nakorsaqarfik Inuussutissalerinermullu Oqartussaqarfiup kommune suleqatigalugu terianniamik takunniffimmi nunaminertamik assiaqutsiisimavoq qimmeqarfiusumi, pineqartumi nalunaaqutsersuisimalluni. Qimmiutillit nerukkaajartortut kisimik sumiiffimmukarsinnaatitaapput.

Avannaata Qimussersua Ilulissani sapaatit akunneri marluk qaangiuppata ingerlanneqartussaavoq.