Inatsisartut qinigaarlaat 15. maj ataatsimiissapput
Inatsisartunut ilaasortat qinigaarlaat marlunngornermi 15. maj aamma pingasunngornermi 16. maj inissitsiterfiusumik ataatsimiigiaqquneqarput
Inatsisartunut sivisunerpaamik ilaasortaasimasoq Hans Enoksen (PN), Inatsisartunut sapinngisamik piaartumik inissitsiterfiusumik ataatsimiigiaqqusinissamik qinnuteqarluni Kim Kielsenimit (S) saaffiginnissummik ullumi tigusaqarpoq.
Inatsisartut qinigaarlaat 2018-imi marlunngornermi 15. maj kiisalu pingasunngornermi 16. maj inissitsiterfiusumik ataatsimiigiaqquneqarnissaat Hans Enoksenip
aalajangiuppaa, Inatsisartut Allattoqarfia tusagassiuutinut nalunaarummi paasissutissiivoq.
Inatsisartut ataatsimiinnerat pisarneq malillugu Hans Egedep illuani nal. 9.00 ullaakkorsioqatigiinnermik kingornalu Inatsisartunut ilaasortat Annaassisutta Oqaluffianut nal. 10.00 naalagiariartorlutik ingerlaaqatigiinnerannik aallarnerneqassaaq.
Naalagiareernermi ilaasortat Inatsisartut illorsuannut ingerlaaqatigiissapput, tassani
inissitsiterfiusumik ataatsimiinneq nal. 11.00 aallarnerneqassalluni.
