Inatsit nutaaq pinngitsoortinniarlugu Namminersorlutik Oqartussat allamut sangusut
Namminersorlutik Oqartussat ilaani inatsisissaq nutaaq akornguserniarlugu suliaqaleruttorput. Inatsisissap nutaap qulakkiissavaa pisortat suliassanut annertungaatsiartumik aningaasartalinnut neqerooruteqartitsisarnissaat, unammillersinnaasoqartoqartikkumallugu.
Aningaasanut inatsisissatut 2019-imut siunnersuummi oqaasertaliussat ima oqaasertaqartut Attaveqaqatigiinnermut Naalakkersuisoqarfimmit ilanngunneqarsimapput:
Ingerlatseqatigiiffiit tallimat toqqarneqartut
”Naalakkersuisut piginnaatinneqarput tulliuttunik avataaneersunik suleqateqarsinnaanermut isumaqatigiissuteqarnissamut: Orbicon Arctic, Rambøll, Deloitte, Inuplan aamma Sweco Kalaallit Nunaanni attaveqaqatigiinnermut tunngasunik misissueqqissaarnissamut suliaqarnissamullu”.
Ingerlatseqatigiiffiit taaneqartut taaneqarnertik iluarisimaarutigissagunarpaat, suliaqarfimminnimi assiganik suleqatiminnut unammillertariaarukkamik. Aningaasanummi inatsisissatut 2019-imut siunnersuummi “aningaasartuutit allat” 7 milliuunit koruuningajaat aningaasaliissutigineqarsimapput.
Nassuiaat: Amigaateqarneq
Attaveqaqatigiinnemut Naalakkersuisoqarfiup iliuuserineqartoq ima nassuiarpaa:
”Ersarissaanerup siunertaraa, suliaqartunut ataavartumik isumaqatigiissusiornissamut naammattumik tunngavissaqarnissaq, inatsisissami ukiortaami atuutilertussatut naatsorsuutigineqartumi aalajangersakkat qanoq ikkaluarpataluunniit. Naalakkersuisoqarfiup nassuerutigisariaqarsimavaa suliassanut assigiinngitsunut neqerooruteqartitsinissamut isumalluutinik naammattunik pissaqarsimanani, taamaattumillu aningaasanut inatsisissamut siunnersuummut 2019-moortumut oqaaseqaatit ilanngunneqarnissaat qinnutigisariaqarsimallugu”.
Neqerooruteqartitsisarnissamut inatsisissap siunertaa
Naalakkersuisoqarfiup isumalluutinik amigaateqarneq tikkuarpaa, neqerooruteqartitsisarnissamullu inatsisip siunertaa, ilaatigut ima oqaasertaqartoq, taamaalilluni atortariaqanngikkallarlugu:
- Inatsisartut inatsisaatigut siunertaasoq tassaavoq pisortat pisiniartarneranni periaatsit aalajangersassallugit taamaaliornikkullu pisortat aningaasaataasa atorluarneqarnerpaanissaat anguniarlugu unammilleqatigiinneq pitsaanerusoq anguniassallugu, siunnersuut novembarip 19-ani aappassaaneerneqartussaq taama oqaasertaqarpoq.
Sulisitsisut pisortaa Brian Buus Petersen Sermitsiaq.AG-mut ima oqarpoq:
Sulisitsisut: Imminnut assortuuttut
- Imminnut assortuuppalupput, suliassat siunnersortinit suliarineqartussat pillugit aaqqissuussisoqarniarpoq, illuatungaanilu inatsisip atuutsilerneqartussap suli atulinnginnerani pilersaarusiortoqalereerluni isumaqatigiissuteqarfiit aalajangersimasut inatsimmi atuutsinneqassannginnerinik.
- Naalakkersuisut iluanni naleqquttumik ataqatigiissaarisoqarpalunngilaq, Sulisitsisut pisortaata tikkuarpaa nangillunilu:
- Neqerooruteqartitsisariaqarnissamut inatsisissap qanoq atornissaa qanoq ikkaluarpalluunniit tulluarsorinngilarput aningaasaliissutissanut aalajangersimasunut suleqatissanik immikkut toqqartuisoqalereernissaa, Brian Buus Pedersen naqissusiivoq.
