Reykjanesip qeqertaasaata ataani innermik anitsisartoq katersuuteqqippoq, decembarimilu ulluni pingasuni innermik anitsisoqarnerani pisumut assingusumik maanna innermik anitsisoqarnissaa ernummatigineqarpoq.

Nuna Svartengimiittoq decembarimi innermik anitsinnginnerminit maanna qaffasinneruvoq. Islandimi silasiorfimmit Benedigt Òfeigsson naapertorlugu qaqqap innermik anitsisarfia decembarimi anitsinermut sanilliullugu 75 procentimik qaffasinneruvoq.

- Taamaattoqarnera anitsisoqaqqinnissaanik takussutissaavoq, Benedigt Òfeigsson Islandimi tusagassaqartitsivimmut RÚV-imut oqarpoq. Qaquguluunniit taamaattoqaqqissinnaasoq naliliisoqarpoq.

Blå Lagune ammaqqippoq

Illoqarfiit eqqaaniittut ilaannit 3600-nik inulimmit Grindavikimit, novembarip qulingani nunap sajorujussuarnera aqqusinernik, inissianik atassuteqaatinillu allanik ajoquseerujussuartoq pissutigalugu inuit qimagussortinneqarput.

Takornarianit ornigarluarneqartartoq Blå Lagune arfininngormat ammaqqinneqarpoq. Immikkut ilisimasallit naliliipput, Blå Lagunep eqqaani innermik anitsisoqarnissaa ilimananngitsoq.

- Innermik anitsisoqalissagaluarpat inuit qimarnguffissaannik isumaginninnissamut piffissaqarluassaaq, immikkut ilisimasalik oqarpoq.