Island: Unnuap qeqqata kingorna nunap sajunneri suli arlallit
Islandimi qeqertami Reykjanesimi nunap sajunneranik pissutsit oqartussaasunit malinnaavigineqarput, ippassarlili nunap sajunnera allanngorsimanngitsoq taakku nalunaarutigaat.
Islandimi tusagassiorfik Visir.is Islandimi ilisimasallit innersuussutigalugit allappoq, illoqarfimmi qimagussorsimasumi Grindavíkimi innermik anitsisoqarnissaa siornatigormit aarlerinannginnerusoq, naak suli innermik anitsisoqarsinnaagaluartoq.
Islandimi silasiortut Facebookikkut nalunaarput, ullormi kingullermi qaqqap innermik anitsisartup anitsiffiani, decembarip 18-iani aallartittumi, innermik anitsineq annertunerpaasimasoq.
Nunap sajunnera taamaaginnartoq
- Nunap sajunnerata sakkortussusaa allannguuteqarpallaanngilaq, innermik anitsilerneraniilli allanngortoqangaarsimanani. Tamanna eqqarsaatigalugu ilimasaaruteqanngitsumik Grindavíkimi innermik anitsisoqaqqilernissaa ilimanannginnerusoq, nalunaarummi allassimavoq.
Islandimi silasiorfiup allaffia nutaamik ulorianaatilinnik naliliivoq, taannalu sisamanngornermi ullaakkut atuutilerpoq, naliliinerillu decembarip 28-ata tungaanut atuupput.
Unnuap qeqqata kingorna innermik aniatitsiviup qulaani nunap sajunneri 20-t nalunaarsorneqarsimapput, sajunnersaat 1,9-mik sakkortussuseqarluni, gassillu ulorianartut innermit anitsinermeersut ullumikkut kujammut kangianullu immamut ingerlaarnissaat nalilerneqarpoq.
