Københavnimi illoqarfiup qeqqani inimi pissanganartoqarpasippoq. Qanittukkut Operation Dagsværkip ukioq manna paasisitsiniaassutissaq, ´Kalaallit Nunaat sammillugu´, saqqummiutissavaa. Ullup Operation Dagsværkip ingerlanneqalinnginnerani tassannga kajumissutsiminnik sulisut Danmarkimi gymnasianut angalassapput, Kalaallit Nunaat, pingaartumillu kalaallit inuusuttut ajornartorsiutigisartagaat pillugit oqaluttuassallutik. Tamannali peqatigalugu isummiutiinnakkat qaangersinniarneqassapput.

Taamaattumik ikinngutit akornanniikkaluarlutik kajumissutsiminnik sulisut  ersarissumik angorusuppaat saqqummiussineq ingerlalluarumaartoq.

Ullumikut ataatsimooqatigiinnermi suliassaq misiligarneqarpoq. Kajumissutsiminnik sulisut marlukkaarlutik kammalaatiminnut sassartarput saqqummiussassaminnik saqqummiussillutik. Allagaq najoqqutassaq kopeerneqarnermi kingorna suli kissalaarpoq – oqaasertai naggatissaa tikillugu iluarsaanneqarput. Misileraanerup kingorna inimi ersaartaattoqarpoq.
– Isumaqarpunga ingerlalluarsimasoq. Maanna gymnasianut angalanissatsinnut piareerpugut, Johanna Munch Skylv, kajumissutsiminnik peqataasut ilaat oqarpoq.

Akunneq ataatsimooqatigiinneq aallarnerlugu ajornartorsiutit oqimaatsut, kalaallit inuusuttut atugaat, soorlu imminut toquttarnerit kinguaassiuutitigullu atornerlunneqartarnerit, ammasumik oqaluuserineqarput. Inuusuttut videokkut takussutissiaaqqatigut, namminneq oqaluttuarput.
– Atortutsinnik nassatatsinnik uanga nammineq killitseqaanga. Neriuppunga qallunaat gymnasiami atuartut allat aamma qanilaassuseq taanna malugisinnaassagaat.

Naligiinneq

Malugisinnaassagaat oqaluttuat oqaluttuarineqartut qanoq nunarsuarmi atugaatigalutillu nalinginnaatigisut, isummerfigisinnaassagaallu taamaasillutillu takullugu suliniummik suleqatigiinnissarput qanoq pingaaruteqartigisoq, Johanna Munch Skylv oqarpoq.

Operation Dagsværk atortussaminik piareersaajartorluni marloriarluni Kalaallit Nunaanniissimavoq. Suliniummut pingaaruteqarsimavoq paasisitsiniaanerup kalaallit inuusuttut peqatigalugit ineriartortinnissaa – avataaneersut suliniutaattut isiginagu. Taamaattumik kalaallit inuusuttut namminneq annertuumik oqaaseqartuupput. Aamma namminneq saqqummiussipput suut pisariaqarnersut namminneq kammalaatitillu pitsaanerusumik siunissaqarnissaminnut.
– Kalaallit Nunaanniilluta suna pinerlugu oqaluttuarigaangatsigu pitsaasorpassuarnik qisuariarfigineqartarsimavugut. Pineqartumut ammasuusimagatta suleqatigiinnissarlu siunertaralugu aggersimagatta tamanna pingaaruteqartorujussuusimavoq, tassami tamanna pissutigalugu aallaqqaataaniilli naligiissutut peqatigiilerpugut. Pineqanngilaq ilaat iliuuseqarfigissagivut, pineqarporli peqatigiilluta iliuuseqassasugut, Johanna Munch Skylv oqarpoq.

Kalaallit Nunaat oqaluttuariniaraat

Suliniut Operation Dagsværkimut siunnersuutigineqarsimavoq Ungdommens Røde Korsimit, suliniullu ineriartortinneqarsimalluni Kalaallit Røde Korsiat qanimut suleqatigalugu. Aningaasat katersorneqartut sinerissami tamarmi inuusuttut inuusuttunut suliniutinik pilersitsisarnissamik ilinniartinneqarnerannut atorneqassapput.

Tamannali peqatigalugu qitiusumik allamik siunertaqarpoq: Qallunaat gymnasiami atuartut Kalaallit Nunaannik nutaaliaasumik annertunerusumik ilisimasaqassapput. Ilaatigullu tamanna pissutigalugu Anthon Engell, Nuummeersoq, paasisitsiniaanermut ilanngussimavoq.
– Isumaqarpunga kalaallit tamangajammik Kalaallit Nunaat pillugu qallunaanik paasisitserusuttut. Taamaasillunga isumaqanngilanga tamatumuunakkut immikkooruteqarlunga, taanna oqarpoq.

Anthon Engell ukiuni marlunni Københavnimi atuarsimavoq. Operation Dagsværk siumut ilisimasaqarfigisimanngilaa, Ungdommens Røde Korsimilli saaffigineqarsimalluni, tassa Nuummiilluni tassani peqataasarsimammat. Taanna isumaqarpoq annertunerusumik paasisitsiniaanikkut isummiutiinnakkat akerlilerneqarsinnaasut.
– Kissaatiginarteqaara kalaallit inuusuttut Danmarkimi aqqusinikkut ingerlasinnaassasut isummiutiinnakkanik naapitsinatik, taanna oqarpoq.
– Taamatut oqarama ajortumik isumaqanngilanga, qallunaalli Kalaallit Nunaannik ilisimasaqarpianngitsut amerlaqimmata. Tamannalu tupinnanngilaq tassami qaqutiguinnaq Kalaallit Nunaannik ilinniartinneqartarput, ilikkagaallu amerlasuutigut kukkusuusarput.
– Danmark Kalaallit Nunaallu ataatsimut nukittuumik oqaluttuassartaqarput, taamaattumik aamma pingaaruteqarpoq oqaluttuarisaaneq ataqqissagipput, oqaluttuarisaanrup ilisimaneratigut.

Septembarip 11-ani kajumissutsiminnik sulisut Danmarkimi gymnasianut angalassapput ataatsimut sammisimasartik angallallugu. Gymnasimi atuartut 45.000-it missaanniittut oqalugiarneq tusarnaarumaarpaat. Angalallutik oqalugiariartussat ilagaat Kristine Josefsen, Nuummeersoq.
– Neriuppunga takusinnaassagaat tamakkua ajornartorsiutaasa ilaasa assinginik ajornartorsiuteqaratta. Amerlasuut isumaqarnerattut taama assigiinngissuteqartiginngitsugut, taanna oqarpoq.

Ulloq Daghjælpsdagimik taaneqartoq pissaaq septembarip 7-ani.