Ilulissani qimmit ilaat nerisinnaanngisaminnik nerisinneqarsimagamik, Avannaata Qimussersuarmut peqataanissamut anngunniuffissaq aqaguttoq qimmit ilaat meriarsimapput. 

- Aqangu anngunniuttoqartussaavoq unnuaq manna qimmilivitsinniittoqarsimavoq, qimmilipput aqqutaanngikkaluarpoq aammalu allat pingisaannik qimmilivitsinniittoqarani. Tumit ersareqaat quitta alliup eqqaaneeriarluni qimminut ingerlasajaarsimavoq aggerfimmingullu utersimalluni. Pakatsinaqaaq ajoqusersuiniartoqarsimammat qimmit ilaat meriarsimavoq, Oline Berthelsen Ilulissaneersoq taama Facebookimini allappoq.

Kalaallit Nunaanni Qimussertartut Kattuffianni, KNQK Qimussersuarmi siulittaasoq oqarpoq taanna ajornartorsiut ukiut tamaasa ajornartorsiutaasartoq. Ataqqinninnissamullu kaammattuivoq.

- Soorunami sivitsortumik taanna akiorniartuarparput. Soorunami ileqqussaannginnami. Aqukkuminaappoq ullormut itertaratta pisussaq nalullugu. Facebooki atorlugu kaammattuutigiuarparput ileqqussaanngimmat atoqqunagu. Kulturikkut ilisarnaatitta ilaat inuiattut ataatsimut ileqquussaaq nuannersoq.

Ulloq unnuarlu nakkutiginninneq

Emil Mathiassen Ilulissani Qimussersaq 71-imi siulittaasuuvoq, taakkulu Avannaata Qimussersua Ilulissani marsip ulluisa 16-ani pisussaq aaqqissuussaraat. Taassuma oqarnera naapertorlugu peqataasussat tikerarpata qimmit ataatsimoortillugit Seersuit eqqaani pitoqqajumaartut. Pitoqqaneranilu ulloq unnuarlu nakkutigilluarneqassapput:

- Maaniittoqaraangat tamatigut nakkutilliisoqartarpoq, unnuaq tamaat takkutilliisoqartussaapput. Tikerartussat tamarmik qimmii tamarmik ataatsimoortussaagamik. Nammineq allanut inissiiniarunik, nammineq taakku akisussaaffigisarpaat nakkutiginissaat.

Qimmit serlersaarfigineqartarnerat KNQK-p siulittaasuata akuersaanngilluinnarlugu naqissuserpaa:

- Soorunalimi kattuffittut tamanna akuerinngilarput. Qimussertut tamarmik ataqqinassuseqarput, aamma allat qimmii taamaaliorneqassanngillat. Taamaaliorneq illersuisinnaanngissuseqarnermik takutitsineruvoq. Ileqqussaanngilaq akuerineqartussaananilu.