Arsaq, timmiaq, anaana ataatalu. Meeqqat oqaasii siulliit pingaaruteqangaarput, immaqa ingammik angajoqqaat meerartik pisariaqartitaminik piaarnerpaamik oqaaseqarsinnaanissaa kissaatigigaangassuk.

Meeqqalli oqaatsit siulliit qanoq ilinniartarpaat paasisarlugillu?

Qaammatinit arfinilinniit 26-mut assiliineq

Amerikamiut ilisimatuut misissuisimanerminnik atuagassiami Sciencemi saqqummersumi paasissutissiipput. Ilisimatusarsimanerminni AI-mut tunngatillugu periusissiamik nutaamik saqqummiipput, tassani meeraq ukiuni marlunni assiliissutikkut immiunneqarneranik paasisanik saqqummiillutik.

Meeqqap ukiuni marlunni immiunneqarnerani paasinarsivoq angajoqqaaminit oqaluunneqarnerminni isigisani inissititertarai. Taama Videnskab.dk nittartakkamini allaaserisaqarpoq.

Videnskab.dk allappoq meeqqap takusinnaasai, soorlu iga, kamippaat, qattaq, arsaq allallu meeqqap pinnguaqatiginerani angajoqqaavisa oqaatigigaangamikkit meeqqap oqaasiinut atassuteqartut.

- Assersuutigalugu meeraq anaanaminit sarliarneqarluni atuffanneqarpoq. Anaanaasoq meeqqamik assiliaq atuakkamiittoq tikkuaatigalugu oqarpoq "takuuk, aajuna meeraaraq", taamaalioreernikkut meeraq nammineq atuakkamut tikkuartuilertarpoq anaanaasoq oqaraangat "meeraaraq". Tassuuna paasinarsivoq meeqqap assiliaq oqaatsillu ataqatigiinnerat paasigaa. 

Ilisimatuut amerikamiut naapertorlugit misissuinerup nutaap inernerisa takutippaat meeqqat ataqatigiinnikkut ilikkagaqarnerusartut.

- Misissuisimanerput naapertorlugu oqaatsit tunngaviusut ilinniarneqaraangata oqaatsit assigiinngitsut assigiinngitsunut atassusersornerisigut ilikkarneqartarpoq, Wai Keen Vong oqarpoq.