Inuiaqatigiit digitaliusut ingerlalluassagunik paasissutissat isumannaatsuunissaat tutsuiginartuunissaallu pisariaqarput. Oqartussaasut attaveqaatit kiffartuussinerillu isumannaatsuunissaat pisariaqartumik eqqumaffiginngilaat, tamannalu Nalunaarasuartaateqarnikkut aqutsisoqarfiup maanna aaqqinniarpaa.

- Kalaallit Nunaanni attaveqaatit ajoquserneqarsinnaasut ukiuni kingullerni misilittakkat takutippaat. Nunat allat pissaanillit pissutigalugit nunap immikkoortuini politikkikkut pissutsit kisiisa pissutaanngillat, aammali silap pissusia nunallu immikkoortuini unammilligassat pissutigalugit, tassanilu attaveqaatit taarserneqarsinnaanerat pingaaruteqarneruvoq, Nalunaarasuartaateqarnikkut aqutsisoqarfiup allaffiani pisortaq Louise Restorff Jacobsen Sermitsiaq.AG-mut oqarpoq.

Akisussaaffik

Attaveqaatit kiffartuussinerillu isumannaatsuunissaat ullumikkut Tusass A/S-ip akisussaaffigaa. Taamaattumik oqartussaasut akisussaaffik tamanna pisortatigoortumik akisussaaffiginngilaat.

- Akisussaaffik tamanna Nalunaarasuartaateqarnikkut aqutsisoqarfimmi qaffakkiartortikkusupparput, ilaatigut immikkut siunnersortimik imaluunniit siunnersortimik pisortamik atorfinitsitsinikkut, Nalunaarasuartaateqarnikkut aqutsisoqarfimmi suliassaqarfimmi tamatumani piginnaasanik nukittorsaanissarput pingaaruteqarmat, allaffimmi pisortaq oqarpoq, ilisimatitsissutigalugulu atorfik pilersinneqaqqammersoq, suliallu tamatuma nukittorsarneqarnissaa aallartittoq, nassuerutigalugu „sulisup ataasiinnaap suliassamik tamatuminnga kisimiilluni naammassinnissinnaaneranik isuma sianiilliornerussasoq“.

Allaffimmi pisortaq ilisimatitsivoq malittarisassat inatsisillu ullumikkumut tulluarnersut misissorneqarnissaata sulissutaanissaa pisariaqartoq.

- Naluneqanngitsutut Inatsisartut inatsisinik akuersisarput, kisianni Nalunaarasuartaateqarnikkut aqutsisoqarfik ilaatigut Naalakkersuisut kissaataat malillugit inatsisissatut siunnersuutinik suliaqartarpoq, Louise Restorff Jacobsen nassuiaavoq.

Nalunaaruteqartarneq pisussaaffillu

Innersuussutigaa internettimi kiffartuussinernilu isumannaallisaanermut danskit inatsisaat, tassanilu attaveqaatitigut sullissisut ilaatigut attaveqaatit pingaarutillit pisiarineqarnerannut, isumannaallisaanermut tunngasunik pisoqarneranut upalungaarsimanermullu atatillugu nalunaaruteqarnissamut pisussaaffeqarput.

- Taamatuttaaq Danmarkimi Center for Cybersikkerhed upalungaarsimanermi inuiaqatigiit attaveqaqatigiinnermut pilersorneqarnerannut atatillugu pissutsinilu immikkut ittuni ataqatigiissaarisutut inissisimaffeqartarpoq, upalungaarsimasullu oqarasuaatikkut internettikkullu attaveqarneq pisariaqartippaat, allaffimmi pisortaq attaveqaqatigiinnermi suliniut nutaaq pillugu oqarpoq.

Attaveqaqatigiinnermut oqartussaasut pingasunut agguataarneqarsinnaapput, tassa Nalunaarasuartaateqarnikkut aqutsisoqarfiup, Ineqarnermut Attaveqaqatigiinnermullu Naalakkersuisoqarfimmit akisussaaffigineqartup, attaveqaqatigiinnermut attaveqaatinut kiffartuussinernullu akisussaaffeqarpoq, paasissutissiisarnerlu Digitaliserinermut aqutsisoqarfimmit, Naalakkersuisut siulittaasuata naalakkersuisoqarfianit akisussaaffigineqartumit, akisussaaffigineqarluni.