- Aalisariummut 'Ilivileq'-mut ilaallunga Qaqortumut unnuaq tikippunga. Islandermiut Brim HF suleqatigalugit aalisariummi inissaqalerlunga. 

Torbjørn C. Pedersen Sermitsiaq.AG-mut oqaluttuarpoq. 

35-nik ukiullip nunarsuarmi nunat tamakkerlugit tikinniarlugit angalavoq. Nunat tikitani tamaasa timmisartoq atornagu ornittarniarlugit. Angalaneq oktobarip qulinganni Danmarkimi aallartippoq, tassanngaanniillu nunat 203-t tikinniarlugit anguniagaqarluni. Nunat assigiinngitsut 40-t tikereerpai qaammatini sisamani kingullerni. 

- Nuummukarnissannut RAL attaveqarfigaara. Naatsorsuutigisimagaluarparput arfininngormat Qaqortumut tikissalluta, taamaattumik kingusinaarluta tikippugut. RAL-ip umiarsuaanut ilaasinnaaninnut aqagu arfininngornermi aallarnissamut suli akuersissut utaqqivara, naatsorsuutigaarali ajornavianngitsoq. RAL-ip angalaninnut tapersersuillutik uannut oqareerput, Torbjørn C. Pedersen oqaluttuarpoq.

Siullermeerluni nunatsinniinngilaq
- Kalaallit Nunaannut uteqqilluni nuanneqaaq. Blue Shipping Waterimi 2008-mi qaammatini sisamani allaffimmiutut atorfeqarnikuuvunga. Kalaallit Nunaanniit Canadaliarnissara ilisimasakka atorlugit aallassaanga. Canadamiut aalisariutaannut ilaallunga ukioq kingulleq ilaasussaagaluarpunga.

- Polenimi, Skotlandimi Islandimilu angalanera kinguaattoorpoq, Kalaallit Nunaannukarneralu kingusinaarujussuarluni. Canadamiut aalisariutaat qangalilu utereerput, aatsaallu juunimi juulimiluunniit uteqqittussaapput. Pilersaarutigineqarporli uterunik aalisaqqaarumaartut, aatsaallu decembarimi Canadamut utissallutik. 

Kalaallit Nunaat tikinneqartariaqartoq
- Islandimiillungali paasivara Canadamiut aalisariutaannut ilaasinnaanissannut kingusinaarlunga. Kalaallit Nunaannili assileerusuppunga misigisakkalu nunarsuarmioqatitsinnut oqaluttuarerusullugit. Nunarmi kusanartorujussuuvoq nunarsuarmioqatitta takusariaqagaat ilisimasaqarfigisariaqagaallu. Neriuutigaara Nuummit Canadaliarsinnaassallunga, periarfissinneqaruma periarfissaq ingerlaannaq tigussavara. 

- Suleqatigiittoqarsinnaanera uani angalaninni paasitinniarpara. Allanit ikiorneqarsinnaanngikkuma ingerlariaqqissinnaanngilanga, soorlu Canadaliarnissara maannakkut taamatut isikkoqarallartoq. Ikiortissamma siunissara aalajangissavaat. Canadaliaruma ikiortissaqarluarnerussaanga, nunavissuarmimi assigiinngitsunik 40-nik nunaqarpoq, Torbjørn C. Pedersen oqaluttuarpoq.