Aningaasaqarnermut Inatsisissaq Naalakkersuisunit tallimanngormat aningaasaqarnermut siunnersuutaat nutaaq saqqummiunneqarpoq.

- Allannguinissaq pingaarnertut aaqqissuinermut tunngassuteqarpoq aammalu aningaasanut inatsimmi aningaasaliissutit imaluunniit angusassatut missingiutit allanngornerannik nassataqassanani, allannguineq Pele Brobergimit nassuiaassutigineqarpoq.

Siunnersuummi nutaami Qaqortumi, Nuummi Ilulissanilu mittarfiliornissat ilaatinneqarput.

Tassani apeqqummi Naalakkersuisooqatigiit Partii Naleraq aamma Siumut assigiinngitsunik isumaqarput, tassani mittarfiit takissusissaat isumaqatigiinngissutigineqarluni.

Pele Broberg tusagassiutinut nalunaarummi ima nassuiaavoq:

- Oqaasertaliussanut nutartikkanik ilanngussisoqarpoq, taamaalilluni aningaasanut inatsisissatut siunnersuummi konto pingaarnermut 10.13.11 (Aktiaateqarluni ingerlatseqatigiiffinnut toqqaannartumik aningaasartuutit) oqaasertaliussat Kalaallit Airports A/S-ip ataani mittarfiliortiternernut tunngasut 2018-mut Aningaasanut Inatsimmut ilanngunneqartut ingerlaqqissallutik. Aningaasanut inatsisissatut siunnersuut naqitaq piaarnerpaamik malinnaatinneqassaaq.

Nassuiaat eqqumiitsoq
Nutartikkanik ilanngussaqarsimaneq kingornalu 'Aningaasanut Inatsimmut ilanngunneqartunik' nassuiaat eqqumiiginarpoq. Imminnut qanoq ataqatigiinnerat itinerusumik oqaaseqarfigineqanngilaq. Tamanna pilluguli Pele Broberg ima nassuiaateqarpoq:

- Mittarfinnik sanaartornissamut inatsisissatut siunnersuummik (IIA2018/21) Inatsisartut suliarinninnerata siunertaanngitsumik tatineqarsinnaanera oqaasertaliussat siuliani allassimasut allanngortinnagit ingerlatiinnarneqarpata oqilisarneqarsinnaasoq Naalakkersuisut naliliipput. Sanaartorneq pillugu inatsisissamut nutaamut Naalakkersuisut siunnersuutaannik Inatsisartut suliaqarnerisa ingerlateqqinneqarnissaani naalakkersuinikkut akulerunnissaq Naalakkersuisut kissaatiginngilaat, malittarisassanik nutaanik taartaasussanik akuersissuteqartoqartinnagu oqaasertaliussat taaneqartut ilaatinneqanngippata tamanna peratarsinnaavoq.

Tele Greenland mittarfissanut qanoq tapiliussaqassanersoq nassuiarneqanngilaq.