Qutsissuni angalaneq: Nick, Tanja, Peter Rikkelu Argentinami qaqqamut qaqiniarput
Angalaqatigiit Ilulissaneersut maannakkorpiaq qaqqarsuarmi Aconcaguamiipput.
Maluginiagassaq! Allaaserisaq una aviisimit Sermitsiamit tallimanngorneq 12. januarimi saqqummertumit tigulaagaavoq.
Ulluni kingullerpassuarni Nick Nielsen, Tanja Johansen, Peter Davidsen aamma Rikke Gram Rysgaard Ilulissaneersut Base Campimi, Plaza de Mulasimi, 4300 meterisut portutigisumi Argentinap qaqqaani Aconcaguamiipput.
Tassani qaqqaq 6962 meterisut portutigisoq qaqiniarsarinnginnerani unnuisarniarput. Ullut tamaasa pissutsinut allanut sungiussiartorniarlutik majuartarput, qaffasissorujussuarmut angalanissamut iluaqutissaminnik. Ullormut kilometerit amerlanngitsut ingerlasarput, metererpassuarnilli portutigisumik qaffakkiartorlutik.
Assersuutigalugu unnuiffissaminnit Nido de Condoresimut angalaneq 4 kilometerisut isortartutigigaluarluni 1300 meterinik portussuseqarmat angalaneq ilungersunarluinnarlunilu piumasaqarnartorujussuuvoq, Rikke Gram Rysgaard oqaluttuarpoq.
- Tammaarsimaarfimmiiginnarluta qaqqakkut qummut ammullu pisoqattaartarniarpugut. Taamaaliussaagut pissutsinut allanut sungiussilluarnerpaajumalluta. Angalanitsinni siumukarnerugutta, qaqqakkut majuarnerussaagut unnuillutalu. Unnuilli ikittuinnarni, taamatummi qaffasitsigisumi ima iluaalliortoqartigisarpoq nerisoqarsinnaanani sinittoqarsinnaananiluunniit, Rikke Gram Rysgaard oqaluttuarpoq.
Angalanissamut sungiusarneq
Pilersaarut malillugu Ilulissaneersut sapaatip-akunnerata pingajuani qaqinissartik neriuutigaat, kisiannili anori silalu apeqqutaanerpaapput. Qaqqap qaavani anorersuarajuppoq, tamannalu ingalassimasariaqarpaat, anorersuaraangat inuunermut navianarsinnaammat.
- Ulluni siullerni arlaliulluta niaqorloqqaartarpugut, qujanartumilli maanna peerulluinnarpoq. Tamatta ajunngilagut, qasoqqalaarpugulli, Rikke Gram Rysgaard, najukkami suliffeqarfimmik Inuk Adventuremik, pisuttuarnikkut qaqqasiornikkullu takornariartitsisarfimmik piginnittoq oqarpoq.
Angalaqatigiit qanoq ingerlanersut pillugu allaaserisaq tamaat atuaruk aviisi Sermitsiaq aqqutigalugu:
