Sikoqqaartariaqassaaq. Siku Crossili, Uummannaq eqqaani sikukkut halvmaratonimik aaqqissuussisimasoq, sikukkut maratonertitsissalluni pilersaarutiliuleruttorpoq. Sikumi maratonertitsinissaq 30. marts 2024 pissaaq.

Siku Crossip sikumi 42,2 kilometerisut takitingisumik arpaffissaliornissaq pilersaarusiorpaa.

- Siorna arpatitsisarneq aallartittoq Ice Halfmarathonimik taajuuteqarsinnarluni maanna Ice Marathoninngorpoq, pissutaalluni maraton 42,2km ingerlanneqassammat, saniatingullu halvmaraton 21,1km toqqarneqarsinnaalluni.

- Pisortatingoortumik Uummannami siullerpaamik maraton ingerlanneqassooq kiisalu nunatsinni, imaassinnaasorlu nunarsuarmi, Siku Crossimi aaqqissuisut ilisimatitsipput.

Najukkami suliaqartut neqeroorusiorput

Siku Crossimi aaqqissueqataasartoq ilisimatitsivoq Ice halfmaraton allamiunik nunatsinnilu illoqarfinni nunaqarfinnilu allani najugalinnik siorna ornigarneqarluarsimasoq. Arpaqataasut 70-iusimapput, taakkunannga Danmarkimiit, nunanit allaniit nunattalu sineriaanit peqataasut arlaqarlutik.

- Avataaniik soqutingineqarluarnera malunnarpoq, nunatta sineriaaniik. Aamma Uummannami unnuisarfiutillit "Avani" arpakkianut unnuisarfiutitik 50%-mik akikillinikuuaat neriuutingalutingu tikittoqarluarumaartoq, Siku Crossimiit Anguteeraq Grønvold oqaluttuarpoq.

Aaqqissuisut ilisimatitsipput arpatsitsinissaq maanna pilersaarusiorneqartoq, ataatsimiinnerillu ingerlanneqaqattaartut.

Siku Cross Uummannami timersornernik allanik, soorlu akunnerni 24-ni arpatitsinernik triathlonimillu aamma ingerlataqartarput.