Qatanngutigiit Sondre aamma Ukaleq Slettemark sisoraatinik ooqattaasarnermi IBU Cupimi, Østrigimi Obertilliach-imi ingerlanneqartumi, single miximi stafeternermi unamminermi angusarissaarput.

- Piareersarluarsimanngikkaluarlutik holdinit 24-usunit tupinnaannartumik normu 7-inngorput. Kalaallit Nunaat bronzennattunit Tysklandimeersunit, sekundinik 40-nnarnik kinguaqqavoq, Kalaallit Nunaanni Biathlonertartut Kattuffiat ilisimatitsivoq.

Kattuffik naapertorlugu ingammik Sondre Slettemarkip ooqattaasarnera sukkasuumillu ingerlaarnera ajunngitsumik angusaqarnerannut pissutaanerpaapput.

- Marluullutik 20-t tamaasa eqqorpaat, saniatigut marloriaannarlutik igillutik. Nunat allat 23-t arlaannaalluunniit pitsaanerusumik ooqattaasanngilaq, Ukalerlu arpaliuttunit tamanit sukkanerpaalluni ooqattaasarpoq, Biathlonip Kattuffia allappoq.

Inuiaat pissaasut ajugaaffigineqarput

Naak aallartisarneq uivernalaarsimagaluartoq angusarissaarput, tassami Ukaleq Slettermarkip unamminissaq sioqqullugu løjpi sisoraatiniluunniit misilittarsinnaasimanngimmagit, aammalu marluullutik ooqattaavik sungiusarfigisimanngimmassuk.

Nunat soorlu Finland, Italia, Schweiz, USA, Tjekkia Polenilu unamminermi Kalaallit Nunaata ajugaaffigai.

Single mix stafet tassaavoq stafet naatsoq, tassani unammisartut tamarmik marloriarlutik arpallutik sisamariarlutik ooqattaasartarput. Ooqattaavik eqqunngikkaanni saniatigut pingasoriarluni ooqattaasarnissamut periarfissaqarpoq. Suli uniorsimagaanni pillaatitut 75 meterimut arpaqqittoqassaaq. Arpattartup siulliup 1,5 kilometeri sisamariarluni arpassavaa, aappaatalu 1,5 kilometeri tallimariarluni arpassallugu, kattuffik nassuiaavoq.