Obs: Allaaserisami allassimagaluarpoq suliaq pillugu Sermitsiaq.AG aningaasaqarnermut naalakkersuisoqarfiup ataani Nuna Tamakkerlugu Pilersaarusiornermik Immikkoortortaqarfimmut apeqquteqarsimagaluartoq. Tamannali paatsoornermik tunngaveqarmat allaaserisami ilaatinneqartoq peerneqarpoq.

Siumut sinnerlugu Inatsisartunut ilaasortap Doris J. Jensenip akitsuut nutaaq 10 koruuniusoq tupigusuutigaa apeqquteqaatigaalu.

Doris J. Jensenip apeqqutini ima tunngavilerpaa "Nunatsinni ataatsimut orniguffigisinnaasatsinnut nunamik piginnittussaaneq atunnginnatsigu paaserusuppara, Naalakkersuisut Kalaallit Airportsimut piginnittutut atuutsinneqalertussamut tunngatillugu inatsit suna tunngavissarineraat".

Akitsuut imaluunniit akiliut

Kalaallit Airportsip februaarip 17-ianni ajuusaarutigaa taxartartunut akitsuummik nutaamik atuutilersitsineq akitsuutitut oqaatigineqarmat. Akitsuutaanani akiliutaasoq Namminersorlutik Oqartussat timmisartuutileqatigiiffiutaata attaveqaqatigiinnermut pisortaa, Mikkel Bjarnø Lund, nassuiaavoq.

Nalunaarummi tamatumani aamma ingerlatseqatigiiffik ima nalunaarpoq:

- Ilanngullugu oqaatigisinnaavara akiliummik atuutsitsilernissamut akiliisitsisalernissamullu akuersissutinik pisariaqartunik KAIR-imi piniareeratta.

Inuit namminneq biiliminnik aallariartortartut angalanerminnilu biiliminnik mittarfiup biilinut uninngasarfiani uninngatitsisartut akiliisinneqartassanersut Kalaallit Airportsip maannakkorpiaq oqaatigiumanngilaa.

SIK-p kamannera

SIK-p siulittaasuata Jess G. Berthelsenip akiliut nutaaq kamaatigaa, taannalu isumaqarpoq „naammalersoq“.

Tusagassiuutinut nalunaarummi aperivoq Kalaallit Airportip nunaminertaq pisiarisimaneraa, illuutileqatigiit aamma eqqaminnut biilinik inissiisartut akiliisittalerunikkit assigiinnarmagu.

- Maani nunami nunaminertamik pisisoqarsinnaanngilaq, aamma neriuppunga taamaalissanngitsoq. Taamaattumik Kalaallit Airport akiliisitsisalernissamut tunngavissaqanngilaq.