Ukaleq Slettemark uniunngiiveqqippoq. Eqqoriagassat sisamat tamarmik immikkut tallimanik eqqoriagassallit tamaasa eqqorpai, taamaalillunilu normu 45-tut apuuppoq. Sapaatip-akunnerata naanerani Italiami biathlonimi World Cupimi unamminermi naatsumi ataasiakkaarluni arpannermi taama pisoqarpoq.

Kalaallit Nunaanni Biathlonertartut Kattuffiat taamatut tusagassiuutinut nalunaaruteqarpoq.

- Timikkut sungiusarluarsimanerma uteqqinnera malugalugu nuanneqaaq. Juulli sioqqullugu pitsaavallaanngilaq, maannali misigivunga ingerlalluarlunga. Isiginnaariat 10.000-t akornanni 20-t 20-usunit eqqorlugit nuannerluinnarpoq, Ukaleq Slettemark angusani pillugu oqarpoq.

Pingasoriarluni kukkussuteqarani iginneq

Ukaleq Slettemark pingajussaa World Cupimi kukkussuteqarani apuuppoq.

Ukioq tamaat Ukallip nakissusaa 92 %-imiippoq, World Cupimilu arnat akornanni taamaallaat ataasiinnaq nakerneruvoq, tyski Vanessa Voight 94 procentimik nakissuseqarmat.

- Løjpeni suli sukkanerusinnaavunga. Sakkortuallaamik aallartinnera ilaatigut pisooqataagunarpoq, tamannalu immap qaavanit 1500 meterinik qutsitsigisumi ooqattaaritilluni pillaataavoq. Maanna angerlaqqissaanga, februarillu qulingiluaani aallartittussamut VM-ernissama tungaanut sungiusaqqissaarlunga. Tjekkiami nunami pukkitsumi pissaaq, taamaattumik qilanaarpunga, Ukaleq oqarpoq.