Ukioq manna Koda Awards-imut innersuunneqartut
Ukioq manna Koda Awards-imik nersornaasiisoqarpat kalaallit nipilersuutaannik nersuineq Sisimiuni ingerlanneqassaaq.
Qaammat manna kingusinnerusukkut Koda Awards ingerlanneqassaaq, ukioq mannalu Sisimiuni kulturip illorsuani Taseralimmi tamanna pissaaq.
Koda Awards 1991-imiilli kalaallit erinniortui taalliortuilu nersorniarlugit nersornaasiisarpoq, Koda tusagassiuutinut nalunaarummi allappoq.
Nersornaat siulleq 1991-imi tunniunneqartoq tassaavoq 'kalaallit erinniortuinut taalliortuinullu inuusuttunut nersornaasiussaq', nersornaallu nipilersortartumut erinarsortartumullu Ole Kristiansenimut tunniunneqarpoq.
Taamanimiilli ukiumut ataasiartumik kalaallit nipilersortartuinut nersornaasiisarneq ingerlanneqartalerpoq, massakkut Koda Awardsitut ilisimaneqalersimasutut.
Ukioq 2024 Nersornaasiussinissamut naliliisuusut ukuupput:
- KNR sinnerlugu: Nukannguaq Kajusen
- Katuaq sinnerlugu: Birte Olsen
- Nipiaa Rockfestival sinnerlugu : Peter Kleemann
- IluNipe sinnerlugu: Hartmann Heilmann
- Koda sinnerlugu : Laura Lennert Jensen
Ukioq manna nersornaasiinissamut naliliisartut innersuussinissaminnut ulappussimaqaat, ilaatigullu oqaluttuarput:
- Nipilersornerup imarpissuatigut pissanganarluinnartumik angalatitaasimavugut, misigisavullu imaannaasimanngillat! Innersuussiniarnissamut suliamut qilanaaqaluta 2023-mi saqqummersitat tusarnaarsimavavut, tusarnaakkattali tamatta qitaasartittuarluta ilukkut aalassatsittuarsimavaatigut, saqqummersitat tiguartinnangaarmata!
- Nipilersortartunut tamanut piginnaaneqarluarlutik ukioq 2023-mi saqqummersitseqataasunut pilluaqqusiinnarnata qujajumavugut! Erinniatigut taalliatigullu pisuunnguallaatigeqisatsinnik 2023-mi saqqummersitsisimavusi! Eqqumiitsuliortutsialaavusi, nipilersornikkut tupinnarluinnartuliasi aqqutigalugit misigisaqartilluartissimagatsigut tulluusimaarutigeqaarput, nersornaasiinissamut naliliisartut taama oqarput.
Ukioq manna nersornaasissutaasussaapput Ukiumut Nersornaat taavalu Isumalluarnartumut Nersornaat, ukulu innersuunneqarput:
Ukiumut Nersornaat 2023:
- VARNA GL saqqummersitaq ”Pilarngar” pillugu
- Sauwestari saqqummersitaq ”Sauwestari” pillugu.
- Sound of the Damned Saqqummersitaq “Atornerlunnanga” pillugu
Isumalluarnartumut Nersornaat 2023:
- Rene Brandt saqqummersitaq ”Ivé” pillugu
- Najaaraq Fleischer saqqummersitaq ”Blue” pillugu
- MUK saqqummersitaq ”Ingerlavunga” pillugu