Arnat assammik arsarlutik nunanut allanut unammisartuini nuimasut marluk nunarsuarmi pissartanngorniutereernerminni nunanut allanut unammisartuujunnaarput.

Nunanut allanut unammisartunut sungiusaasoq Anders Friis taama Sermitsiaq.AG-mut oqarpoq.

Taakku tassaapput unammisartuni siukkaq Ivaana Holm aamma unammisartuni pitsaanerit ilaat Sascha Jordening Zeeb.

- Assammik arsaattartut pitsaalluinnartut marluk nunanut allanut unammisartuujunnaarput. Marluullutik oqaatigaat allatut pingaarnersiuiniarlutik ilaquttaminnullu piffissaqarnerujumallutik taama aalajangerlutik. Nalunngilara ilaquttaminnit tapersersorneqarluartuusut, kisianni aalajangernerat paasivara ataqqivaralu, Anders Friis Sermitsiaq.AG-mut oqarpoq.

Ivaana Holmip Sermitsiaq.AG-mut itisiliilluni oqarpoq nunanut allanut unammisartunit tunuarniarluni aalajangernerni arlalinnik pissuteqartoq.

- Pissutsit allaanerusuuppata taamaatinnavianngikkaluarpunga. Ulloq naallugu sulisarpunga, meerartaarpunga assammik arsartartutullu tunniusimalluinnarlunga. Malugisarpara ilaannikkut ilaqutariittut naleqartitat tunulliussinnaasarlugit, assammik arsarnermi sapinngisara tamaat iliuuseqarusuttarama, oqarpoq nangillunilu:

Suna tamarmi killissaqarpoq

- Soorunami timersornermik aallussilluartoqarsinnaavoq, sunali tamarmik naggatissaqarpoq, isumaqarpungalu piffissanngortoq nunanut allanut unammisartuunimma taamaatinnissaa, tullinnguuttut akisussaaffimmik tigusisussanngorlugit, Ivaana Holm oqarpoq.

Nunanut allanut unammisartunut sungiusaasoq Anders Friisip qularutiginngilaa nunanut allanut unammisartut Ivaana Holmip aamma Sascha Jordening Zeebip inissisimaffiinik naammassilluarnissartik ajornakusoortissagaat. Aammali erseqqissaatiga assammik arsarnermi ikioqatigiinneq suleqatigiinnerlu qitiulluinnartut, unammisartullu allanngortoqarneranut nalimmassarnissamut piareersimalluinnartartut.

- Unammisartut taakku marluk naammassisimasaat unammisartunut ajornakusoorsinnaavoq, ajornavissortuunngilarli. Assammik arsarnermi immitsinnut tapersersoqatigiittarpugut ikioqatigiilluarsinnaallutalu, nunanullu allanut unammisartut  piginnaasaqarluartooreerput, Anders Friis oqarpoq.

Ivaana Holm taarserlugu nunanut allanut unammisartunut siukkanngortussaq suli aalajangerneqarsimanngitsoq oqarpoq.

Tunniusimalluarsimanerannut nersualaarpai

Anders Friisip Ivaana Holm aamma Sascha Jordening Zeeb nunanut allanut unammisartutut angusimasaat pillugit nersualaarpai. Taakku nunanut allanut unammisartutut Stavanger, Norgemi nunarsuaq tamakkerlugu pissartanngorniunnerni siorna peqataapput, takutitsilluarlutillu.

- Saschap takutippaa sivisuumik ajoqusersimareerluni sungiusarnermik aallussigaanni, nukittunerulluni utertoqarsinnaasoq. Piumassuseqaraanni aqqutissaqartoq, taassuma takutippaa. Saschatut akiuuttuaraanni, piginnaasallu tamaasa atorluaraanni, angusatigut akissarsiassarpassuaqartoq takuarput. Tamanna pillugu nersortariaqarpoq, oqarpoq.

Ivaana Holm Nuummi najugaqarpoq GSS-imilu unammisartuulluni. Nunanut allanut unammisartunut sungiusaasoq oqarpoq nunanut allanut unammisartuulluni angusaqarluassagaanni nunami allami najugaqarnissaq piumasaqaataanngitsoq, unammisartup takutikkaa:

- Ivaana Holmip takutippaa eqiasuilluni suleruloornermi angusaqarluartoqarsinnaasoq. Sungiusarnerit peqataaffigiuaraanni tunniusimagaannilu timersornerup silarsuaani angusaqarluartoqarsinnaavoq. Qularnanngitsumik unammisartunut annertuumik sunniuteqarpoq, tamannalu pillugu qujaffigisassaraarput, nunanut allanut unammisartunut sungiusaasoq oqarpoq.

Ivaana Holm aamma Sascha Jordening Zeeb nunanut allanut unammisartuujunnaaraluarlutik klubbiminni suli assammik arsartartuussapput.