Tasiilamiit Kulusummut qulimiguulimmik januaarip naaneraniilli ulluni arlalinni angallassisoqarsinnaasimanngilaq, tamannalu angalasussat ilungersunarilluinnarsimavaat.

Air Greenlandip ajornartorsiut aaqqinniarlugu najukkami qulimiguulimmik sullissisut GreenlandCopters timmisartuussisarnissaannik aalajangerpoq, siullermillu arfininngornermi februaarip qulingani timmisartuussineq pilluni, tassani Naalakkersuisut siulittaasuat Múte B. Egede aamma aningaasaqarnermut naalakkersuisoq Erik Jensen ilaasunut ilaallutik.

Nalaatsorneq eqqumiitsoq

- Eqqumiippoq Air Greenlandip ullut arlallit qaangiummata ajornartorsiut kiisami aaqqikkaa, tassa aatsaat Tasiilami inuussutissarsiornermik isumasioqatigiinnermi qaffasissumik inissisimaffillit tikeraartussanngormatigut. Sooq Air Greenland siusinnerusukkut GreenlandCopterimik attartorniarluni iliuuseqarsimanngila, Justus Hansen, Kommuneqarfik Sermersuumi Demokraatit sinnerlugit kommunalbestyrelsimi ilaasortaq apeqqusiivoq.

Aamma tupigusuutigaa Air Greenlandip qulimiguuliutaata H155-ip teknikkikkut ajoquteqarnerarlugu sooq nassuiaatigineqarsimanersoq.

GreenlandCopersip qulimiguuliutaa AS350 arfininngormat kingullermik angallassitinneqalermat Air Greenlandip nittartakkamini allaaserisaq takisooq saqqummiuppaa, tassani nassuiarneqarpoq qulimiguulimmik attaveqaqqilernissamut “suliamut” suut pissutaanersut.

Nassuiaat siulleq

- Tasiilamut Tunumilu nunaqarfinnut angalasartut amerlasuut misigisimasaattut, qulimiguuliuterput teknikkikkut ajornartorsiuteqarsimavoq. Ajornartorsiutip aaqqinnissaanut immikkut piginnaaneqarnissaq pisariaqarpoq, piginnaaneqarluartunillu pissarsiniarneq ajornakusoorpoq, Air Greenlandip nittartagaani ilaatigut allassimavoq.

Air Greenlandilli nassuiaataa naammaginanngilaq, nassuiaallu naammaginanngitsoq Sermitsiaq.AG-p paasivaa. Aaqqissuisoqarfimmut ilisimatitsissutigineqarpoq, qulimiguuliup timmisartorsinnaanermut allagartaanik nutarterisoqarsimannginnera pissutaasoq, tamannalu ukiut pingasukkaarlugit pisussaagaluarpoq.

Pissutsit piviusut paasiniarlugit Sermitsiaq.AG-p Air Greenland attaveqarfigaa, tamatumunngalu attaveqaqatigiinnermut pisortaq Inga-Dora G. Markussen Sermitsiaq.AG-mut mailikkut akissuteqarluni allappoq:

Nassuerneq

- Ilumoorpoq qulimiguuliup Tasiilamiittup OY-HUP timmisartorsinnaanermut allagartaa qaangiussimasoq, taamaattumillu misissorneqaqqittariaqarluni allagartamillu nutaamik tunniussisoqartariaqarluni. Pilersaarusiorneqanngikkaangat tamanna arriitsumik ingerlasarpoq ilaatigut angallannermut aqutsisoqarfimmi qulimiguulimmik misissuisoqareeraangat allaffissornikkut suliaqarnermut piffissap sivisuup atorneqartarnera pissutaalluni.

- Pissutsit taamaannerat inuit kukkuneranik pissuteqarpoq, helikopteri Belgiamiit NHV-mit tiguneqarmat, timmisartorsinnaanermut uppernarsaatip ullua atuuttoq paatsoorneqarmat Air Greenlandillu pilersaarusiornermut atortuanut kukkusumik ilanngunneqarluni. Tamanna paasigatsigu helikopteri pineqartoq unitsipparput allanillu aaqqiissutissarsilluta, attaveqaqatigiinnermut pisortaq nangilluni nassuiaavoq.

Air Greenlandip naatsorsuutigaa sapaatip-akunnerata matuma ingerlanerani nammineq qulimiguulimminik timmisartuusseqqissinnaalissalluni.