Nanortalimmi kommunip allaffia nutarterneqareerluni ammaqqittussanngorpoq
Nanortalimmi kommunimi allaffeqarfik oqoqarmat matoqqasimavoq. Allaffeqarfik oquiarneqarluni nutarsarneqareersorlu ammaqqittussanngorpoq. Allaffeqarfimmi iikkat nutaat illullu iluani qaamaneq sulisut suliartornissaminnut qilanaarisinnaanngorpaat.
Kommune Kujallermi allaffiup siorna januaarimili oquiarneqarlunilu nutarsarneqarnera 2,8 millionit koruuninik akeqarpoq.
Kommune Kujalleq nittartakkamini allaaseraa allaffik oqoqarmat matoqqasimasoq, 2,8 millionit koruunillu nalinganut iluarsaanneqareerluni ammaqqittussanngortoq.
Nanortalimmi kommunip allaffeqarfia ullumi sisamanngornermi 8. februar, nalliuttorsiornikkut ammaanersiorneqassaaq.
- Kommunip allafia nutarterneqareerluni atorneqaqqilersoq silaannaarissisimaqisoq, nutaanik iigaqalerlunilu qaammarissisimaqisoq ulluni makkunani sulisunit iserfigineqallattaarpoq, Kommune Kujalleq allappoq.
Ukiuni marlunni matoqqasoq
Allaffik ukiuni marlunni matoqqareermat sulisut allaffimmut nutarsarneqarsimasunut oqoqanngitsumullu suliartorsinnaanngorput:
- Nanortalimmi kommunip allaffia sanasunit, ruujorilerisunit, innaallagialerisunit kiisalu qalipaasunit suliarineqareerluni oquerulluni naammassisoq sulisunit malugusuutigineqassaqaaq, nutarterneqartormi siusinnerusukkut isikkorisimasaminit qaamaneroqaaq silaannarisseqalunilu, Kommune Kujalleq allappoq.
Kommune naapertorlugu nutarterinerup 2023-mi novemberimi naammassineqarnissaa siunniunneqarnikuusimagaluartoq qarasaasianut ikkuffiit sarfallu aqqutaat ullutsinnut naleqqukkunnaarsimasut taarsersortariaqarmata nutarterineq ukioq manna 2024-mi naammassineqarpoq.
