2023-mi imigassartortoqarneruvoq
Siorna imigassamik aalakoornartortalimmik 382 tusind literimik eqqussisoqarpoq tunisasiortoqarlunilu, tamannalu ukiup siulianut sanilliullugu 12 tusind literimik annertuseriarsimavoq. Procentinngorlugu 3,3-mik annertuseriarsimavoq.
Imigassamik atuineq 2023-mi annertusisimagaluartoq, ataatsimut atuineq 1994-imiilli appariarujussuarsimavoq. Ukiut 30-t kingulliit ingerlaneranni imigassamik eqqussuisarneq tunisassiornerlu 28,7 procentimik appariarsimavoq, Naatsorsueqqissaartarfik ilisimatitsivoq.
Imigassamik aalakoornartortalimmik pilersuineq inummut ataatsimut 15-ileereersimasumut 8,5 literimik naleqartoq, ukiullu siulianut sanilliullugu inummut ataatsimut 0,2 literimik imaluunniit 3,0 pct.-imik annertuseriartoq, naatsorsueqqissaartarfiup naatsorsorpaa.
- 8,5 literi aalakoornartua inuup ataatsip atuisup 15-ileereersimasup agguaqatigiissillugu 2023-mi sapaatip akunneranut 10,9-inik imigassartortarpoq, imigassaq ataaseq 1,5 cl-imik akuitsumik aalakoornartortaqartillugu. 10,9-init sapaatip akunneranut imerneqartartunit, baajat 8,0-iupput, viinnillu katillugit 1,8-ullutik imigassarlu 1,0-imik naleqarluni, Naatsorsueqqissaartarfik ukiut qulit kingulliit pillugit naatsorsueqqissaarpoq.
Pingaartumik immiaaqqamik atuineq qaffariarpoq, viinnimik aamma kimittuumik atuineq appariartut. Immiaaqqamik atuineq imigassamik atuinerup 73,7 procenteraa, viinnimik kimittuumik atuineq 16,8 aamma 9,5 procentimiittut.
Imigassat suussusaanut agguarlugit:
- 2022-miiit 2023-mut imigassamik kimittuumik pilersuineq 2,5 tusind literimik annikilleriarsimavoq. 2023-mi imigassamik kimittuumik pilersuineq 36,4 tusind literiuvoq, ukiup siuliani 38,9 tusind literiulluni, annikilleriaat 6,4 pct.-iulluni.
- 2023-mi viinnimik pilersuinermi imigassap aalakoornartua 64,1 tusind literinut annikilleriarsimavoq, ukiup siuliani 68,0 tusind literimiissimalluni. 3,9 tusind literinik tassa 5,8 pct.-imik annikilleriarsimavoq.
- 2023-mi baajanik pilersuinermi imigassap aalakoornartua 281,6 tusind literiusimavoq ukiup siuliani 262,9 tusind literiusoq. Imigassap aalakoornartua taamaalilluni 18,7 tusind literinik imaluuunniit 7,1 pct.-imik qaffariarluni.
Nunap karsiata 2023-mi imigassat akitsuutaannit isertitai 214 mio. kr.-upput, ukiup siulianut sanilliullugu 0 mio. kr.-nik annikilleriarlutik.
