Kommune Kujallermi aamma Avannaata Kommuniani borgmesterit, kommunini taakkunani marlunni angallannermi pissutsit pitsanngoriartinneqartariaqartut marlunngornermi qinnuiginnipput.

Uummannami qulimiguulimmik angallanneq februaarip aallartinneraniilli kinguaattoorfiusaqattaarsimasoq, borgmesteri Palle Jerimiassen allappoq:

- Utoqqaat napparsimasullu Nuummut angalaniaraluarlutik aallarsinnaajunnaartarnerat akuerineqarsinnaanngilaq. Allaammi sapaatip akunneranik kinguaattoornerit pisarput. Pitsaanerusumik kiffartuussisoqartariaqarpoq. Namminersorlutik Oqartussat aamma Air Greenlandip kiffartuussinissamik isumaqatigiissuteqarput, innuttaasut kiffartuunneqarnissaat pillugu, tunulliunneqarnissaat pinnagu, Borgmester Palle Jerimiassen tusagassiuutinut nalunaarummi oqarpoq.

Borgmesterip oqarnera naapertorlugu sumiiffimmi teknikikkut ajornartorsiorfiusimavoq, tamannalu ilaasunut nakorsiartunullu eqquivoq, kisianni aamma allakkat nassiussallu nalinginnaasut kinguaattoortarput.

Sikorsuit kujataani angallannermut akornutaasut

Kommune Kujallermut tunngatillugu, angalasut amerlasuut sikorsuaqarneranit eqqugaaqqasut, borgmester Stine Egede (IA) oqarpoq, tamannalu imaatigut angallassinerit unitsinneqarnerannik kinguneqarpoq:

- Peqqinnissaqarfimmiit angalaniartut ilaatigut ulluni tallimani sivisunerusumilluunniit utaqqisinneqaqattaarput, meeqqat timersoriat unammiarfissaminnut apuutinngitsoorput, ullorparujussuarniluunniit angerlamut apuunniarsarineqarput, nunaqarfittatsinniit angalaniat aamma peqqinnissaqarfinnut angalasusussat ullut 14-it tikilllugit ingerlariaqqinnissaminut utaqqisinneqaqattaartut akueriinnarneqarsinnaanngillat, Stine Egede marlunngornermi allappoq.

Diskoline aamma Air Greenland qaninnerusumik suleqatigiinnissaannut, taanna kaammattuivoq:

- Kujataanimi sikorsuaqarfiusartumi angalaniarneq eqaannerusumik aaqqissuunneqartariaqavippoq. Naalakkersuisut iluunngarlunga qinnuigaassi susassaqartut peqatigalugit iliuuseqaqqullusi. Sikorsuit ukiut siuliinut naleqqiullugit annertupput, sulilu annertunerit uiaattussaapput, borgmesteri oqarpoq.

Sermitsiaq.AG isornartorsiuineq pillugu Air Greenlandimit, Naalakkersuisunut aamma Disko Linemit oqaaseqartitsiniarluni sulissuteqarpoq.