Sanaartornermik suliaqartut, soorlu kuuffissalerisut nunalerisullu, ukiuni arlalinni ingerlalluareernerminni suliassiissutigineqartut ikiliartornerat malugisimavaat. Taamaattumik maanna kommuninit Namminersorlutillu Oqartussanit suliassiissutigineqartut suliarinissaannut piareersimavugut, suliaqarfik nalunaarpoq.

- Ingerlalluarneq appariartornerusoq oqaatigissagaanni mianersortariaqarpugut. Sanaartortoqangaatsiarnikuuvoq, maannali ingerlanerlunnerulaarput, taamaammat patajaalliartorunartutut taaneqarsinnaalerpoq, Sulisitsisut pisortaat Christian Keldsen Sermitsiaq.AG-mut oqarpoq.

Piffissat allanngorfissat ingalassimaneqassasut

Ukiut qulit matuma siornatut pisoqassanngitsoq namminersortut pisortallu isumaqatigiissutigigaat oqarpoq, sanaartornerup unikaallanneratigut sanaartornermik suliaqartut ikiliartormata, malitsigisaanillu soraarsitsisoqartalerlunilu akiliisinnaajunnaartoqartalermat. 

- Ineriartortitseqqinneq sivisusinnaavoq, aamma kommunit Namminersorlutillu Oqartussat oqaloqatigigaangatsigit inissisimaneq pillugu paasineqarnissaq pingaartinneqartarpoq, GE-mi pisortaq erseqqissaavoq.

Pissutsit kommunini assigiinngitsuni assigiinngissuteqartut oqarpoq.

- Sermersuumilu suliassiissutigineqartut maannamut ikilinerpaapput, Christian Keldsen oqarpoq. Nuummi mittarfissualiortoqangaatsiarpoq, illoqarfiullu qeqqani atuarfissuaq sanaartorneqarmat ukiuni kingullerni suliffissaqarluartoqarpoq. Sivitsunngitsorli suliassat taakku naammassineqassapput.

Kajuminneq

Permagreenip pisortaata Jeppe Steffensenip, Sulisitsisut iluanni sanasut kattuffianni siulittaasup, kommunini allaffissornermik ingerlatsivinnik ataatsimeeqateqarluni suliassiissutinik patajaallisaanissamut kajuminneq maluginiarsimasani nuannaarutigaa.

- Aningaasat naleerukkiartornerat, erniat qaffakkiartornerat sanaartornermullu atortussat akiisa qaffakkiartornerat pissutigalugit namminersortut inissialiornissamut aningaasaliinissartik tunuarsimaarfigaat, Jeppe Steffensen oqarpoq.

Nunap ilaani sanaartornermik suliaqartut ulapittoqartarnera pillugu suliassanut neqerooruteqartoqarnissaa ajornakusoortittarpaat, malitsigisaanillu suliassat pilersaarutigineqartut kinguartinneqartarput.

- Maannali suliakkiisartut amerliartuinnarput, taamaattumik oqaloqatigiilluarneq ajunngitsumik kinguneqarumaartoq neriuutigaarput, Christian Keldsen oqarpoq.