Sikusimaqinermit kinguaattoornerit taama amerlatiginnginnissaat anguniarlugu kujataani angallannermi pissutsit pitsanngorsarneqartariaqarput. Marlunngormat Naalakkersuisunut kiisalu Air Greenlandimut Disko Linemullu pitsaanerusumik aaqqiissutissarsinissamik kissaateqarluni nassiussisoq borgmester Stina Egede (IA), taamatut isumaqarpoq.

Borgmesterip Disko Linemik isornartorsiuinera Sermitsiaq.AG-p tusarpaa, sikusimagaluarlunilu angallanneq ingerlaannaqqullugu sapinngisaminik umiarsuaatileqatigiiffik iliuuseqarluni nalunaarpoq:

- Kujataani ajoraluartumik sikorujussuaqqavoq, tamannalu immakkut angallannermut ajornartorsiortitsivoq.

- Ullumikkut ajoraluartumik Narsap Narsarsuullu akornanni, taakkulu aqqutaanniittut nunaqarfiit, Itilleq Qassiarsullu, akornanniinnaq angallassisinnaavugut. Kujataata sinnera ajoraluartumik angallavigiuminaalluinnarpoq, Disko Line allappoq.

Sermeq Helicopters atorneqartartoq

Ullut tamaasa ilaasut ornigassaannut apuunniarlugit Disko Line iliuuseqartarpoq, ornigassamullu aalajangersimasumut angallassisoqarsinnaanngikkaangat ilaasut Air Greenlandip qulimiguuliutaanut nuunneqartarput:

- Ilaasut qulimiguulimmut allamut inissinneqarsinnaanngilluinnaraangata, qulimiguulimmik angallassisartup Sermeq Helicoptersip attartortarnera iluaqutigisorujussuusarparput, Disko Line allappoq nangillunilu:

- Avannaani illoqarfinnit Narsarsuarmut kingusinaarlutik tikittut ajoraluartumik qulimiguulimmik angallanneqarsinnaaneq ajorput. Ajoraluartumik amerlanertigut aqaguanimut, qaqutiguinnaq aqaguaguanimut, utaqqisariaqartarpugut.

Ulluinnarlugu angallassisoqarsinnaanngilaq

Periarfissat killeqarmata maannakkut umiatsiaatiminnik ulluinnarlugu angalatitsisarnertik neqeroorutigisinnaanagu Disko Line ilisimatitsivoq:

- Napparsimasut ulluinnarlugu, assersuutigalugu Narsamiit Qaqortumut uterlutillu angalanissaannik inniminniisimasut, ajoraluartumik angallanneqarsinnaasannginnerannik tamanna isumaqarpoq. Assersuutigalugu napparsimasut tallimat akunnerup ataatsip ingerlanerani Qaqortumi misissortinnissaat qulimiguulimmik angalanermi isumagineqarsinnaannginneranik tamanna pissuteqarpoq.

- Ilaasut ajornartorsiutaat eqqumaffigaavut, sikusimaneralu pissutigalugu angallassisinnaasimanngikkutta ajuusaarutigaarput, Disko Line nalunaarpoq.