Aalisarnermut inatsisissamik nutaamik pilersitsisoqarnissaa Inatsisartut ukiakkut ataatsimiineranni 2017-imi siullermeerneqarpoq. Inatsisartut Naalakkersuisuusimasullu namminneerlutik inatsisiliornissartik aarleqqutigalugu 2019-imi aalisarnermut ataatsimiititaliarsuarmik pilersitsipput. Ataatsimiititaliarsuaq ukiuni marlunni sulereerluni septembarimi 2021-mi innersuusutini tunniuppai. 

Aalisarnermut ataatsimiititaliarsuup isumaliutissiissutai aalisarnermut inatsit naammassineqarnissaanut naammanngilluinnartut, Aalisarnermut Naalakkersuisoq isumaqarpoq. 

- Matoqqasoorujussuarmik suliaq ingerlanneqartariaqanngilaq. Aalisarnermut ataatsimiititaliarsuaq attuumassutilinnik peqataatitaqaraluartoq aalisartut ataasiakkaat, kommunit innuttaasullu isummaminnik annissinissaminut periarfissinneqarnikuunngillat, Aqqaluaq B. Egede Sermitsiaq.AG-imut oqarpoq. 

Taanna ulluni makkuni aalisartut isumasioqatiginiarlugit Ilulissaniippoq. Isumasioqatigiinnermi peqataasussat 70-it missaaniipput. Aqqaluaq B. Egede aalisarnermut attuumassutilligit tamaasa innuttaasunik ataatsimiisitsinerni tusarniaaffigerusuppai.

- Suli siunnerfigaarput upernaakkut 2023-mi siunnersuuteqarnissarput. Innuttaasunik ataatsimiisitsinissarput aaqqissorumaarpagut Ilulissani Nuummilu isumasioqatigiinnerit naammasseriarpata. Inatsisartullu ataatsimiinissaanut oqaluuserisassat qanoq inissisimanersut sammereeriarutsigu isummerfigisassat taakkua ullulersornissaalu inissititserimaarpagut, Aalisarnermut Naalakkersuisoq oqarpoq. 

Kukkusoqassanngilaq

Paggatassiilluni aalisarneq unitsinneqassasoq avataasiorlunilu raajarniarnermi piffissami aalajangersimasumi pisassiissuteqartoqartalissasoq ilaatigut taama aalisarnermut ataatsimiititaliarsuaq innersuussuteqarnikuuvoq. Taamasiornikkummi ungusaataanngitsumik aalisarnermit siunissami ungasissumi inuiaqatigiit aningaasaqarnikkut annertunerpaamik pissarsinissaat anguneqarsinnaasorineqarpoq.

Inatsisiliortoqartinnagu kikkut tamarmik paaseqatigiittariaqartut, Aalisarnermut Naalakkersuisoq isumaqarpoq.

- Kukkusoqassanngippat paaseqatigiiffissat suuneri aaqqiissutissallu suuneri oqaloqatigiinikkut paaseqatigiinniarfissaapput, Aalisarnermut Naalakkersuisoq oqarpoq. 

- Kisianni qanoq ilillutit kikkut tamarmik naammagisimaalersinniassagakkit?

- Nalunngilarput tamaaviisa isumaqataatsillugit aaqqiissuteqarsinnaanata, kisianni tamaaviisa isummersornissamut periarfississinnaasariaqarpagut. Aamma pisariaqarpat innuttaasut aammalu nunap immikkoortuini kommunit isummernissaanik periarfissiinissarput aqqutissiiniarsarivarput. Inuiaqatigiit nalunngittariaqarpaat aalisarnermut inatsisissaq qanoq kinguneqarsinnaanersoq, Aqqaluaq B. Egede nassuiaavoq. 

Naalakkersuisoq Kujallermiit tusagarneq ajorpoq

Aalisarnermut ataatsimiititaliarsuaq Nuummi Ilulissanilu innuttaasunik ataatsimiisitsinikuuvoq. Maniitsumi ataatsimiisitsinissaq taamaatinneqarnikuuvoq Naalakkersuisorlu kujataaniit aalisarneq pillugu annertunerusumik tusagaqarusuppoq. 

- Kujataani annerusumik allannguutissanik takusaqarnikuunngilagut, taamaammat periarfissiiniarsarivugut nunatta kujataani aalisartut, kommuni peqatigiiffiillu aalisarnermi inatsit suliarineqarnissaanut isummersuutai suuneri tusarusuppagut. Ullumikkullu immaqa inuussutissarsiornikkut ingerlatsiniarnermi aporfiusut pitsaaqqutillu ersarissarneqarnerusariaqartut. Taamaammat pingaaruteqarpoq kikkut tamaasa peqataatsinnissaat, Aqqaluaq B. Egede oqarpoq. 

Aalisarnermut ataatsimiititaliarsuup innersuussutai aalisarnermut inatsisissamut naammassinninnissamut naammaattut, Demokraatit Siumulu isumaqarput. KNAPK-ilu isumaqarpoq ataatsimiititaliarsuaq avataasiorluni aalisartut ukkatarivallaaraat, sinerissap qanittuanilu nutarsaaneq eqqarsaatigineqarnani. KNAPK aamma isumaqarpoq inatsisissaq aatsaat 2024-mi siullermeerluni Inatsisartuni suliarineqassasoq, piareersarneq inuiaqatigiinnilu peqataatitsineq qaffasinnerpaaffissaminiitinniarlugit.