Aalisarnermi pisassiissutit aqunneqarnerini ammasumik tunngaveqannginneq nunatsinni oqallisaasaqaaq, ingerlatseqatigiiffiit aalisartullu sorliit aalisakkanut pisassiissutinik pissarsissanersut politikkikkut aalajangerneqartussaanera pissutigalugu.Aalisarnermut inatsisissatut siunnersuutip sunniuteqarluni akuliutinnginnissamut tunngavik qulakkeernerusariaqarpaat, taamaalilluni qanitanik salliutitsinermik pasilliinerit pinngitsoortinneqarniassammata.

Inatsisip aqunneqarnerani suliamik ilisimasallit aalajangiisartunngortinnissaat, aalisarnermut inatsisissamut siunnersuummi atuarneqarsinnaavoq.

Tassa imaappoq, politikkikkut pisassiissutinik agguaasarneq unitsinneqassaaq:

"Sunniuteqarluni akuliutinnginnissamik tunngavik siunnersuutigineqarpoq eqqunneqassasoq taamaalilluni inatsit sapinngisamik annikinnerpaamik Naalakkersuisunut piginnaatitsilerluni,” inatsisissatut siunnersuummut nassuiaatini taama allassimasoqarpoq.

Qanitanik salliutitsinermut pasilliinerit pinngitsoortissinnaagai

Grønlandsbankenilli sunniuteqarluni akuliutinnginnissamik tunngaviup atulersinneqarnissaa maanna siunnersuummi qanoq iluatsitsiginissaa apeqquserpaa.

Tamanna ilaatigut aalisakkanut pisassiissutit nalituut utertinneqarnerannut agguaateqqinneqarnerannullu aalajangersakkat arlallit, aningaaseriviup paasinninnera naapertorlugu ersarlunnerannik pissuteqarpoq, aningaaseriviullu atorfilittat aamma politikerit siunnersuummi sunniuteqarluni akuliutinnginnissamik tunngaviup siunnersuummi qulakkeerneqarnissaanut kaammattuivoq:

- Tamatuma ingerlatsineq tunngavilersorneqanngitsumik pasilliinernut pinngitsoortitsiffigissavaa. Politikkikkut aaqqissuussaanermut tatiginninnermut nukittorsaataassaaq, Kalaallit Nunaallu ingerlatsinermi qanitanut salliutitsinermut pasilliuteqarfigineqarnissaa pinngitsoortillugu, aningaaserivik ilaatigut tusarniaanermut akissuteqarnermini allappoq, inerniliillunilu:

- Missiliuinermut periarfissat amerlavallaartut

- Ataatsimut isigalugu saqqummiunneqartut amerlasuunut ingerlatsinermut tunngatillugu inatsisinik naleqqussaanernut periarfissaqartitsisoq missiliuinernullu paasivarput. Ingerlatsinerup nikinganeqarnissaanut periarfissanut inatsisinik aalajangersimasunik peqartariaqarpoq aamma sunniuteqarluni akuliutinnginnissamik tunngavik pingaartinneqarnerusariaqarpoq.

Upernaakkut 2022-mi aalisarnermut naalakkersuisuusimasoq, Aqqaluaq B. Egede, taanna sioqqullugu naalakkersuisuusarsimasunut, aalisartut akuersissummik pissarsiniarlutik naalakkersuisumut toqqaannartumik saaffiginnittarsimanerat ileqquusoq ilisimatitsimmat tupaallaatigineqarpoq. Naalakkersuisup saaffiginninnerit taakku allaffeqarfimmut siunneruinermut suliamillu ingerlatsinermut ingerlateqqittarpai, Egede oqarpoq.

Transparency International Greenlandip periuseq ”naleqqutinngitsutut” ilaatigut oqaatigaa, taamatullu aamma Aalisarneq pillugu Ataatsimiititaliarsuup isumaliutissiissutimini sunniuteqarluni akuliutinnginnissamik tunngaviup atulersinneqarnissaa innersuussutigaa.