Sana peqqissaasunik naammattunik sulisussarsisimanngilaq. Pilatsittunut immikkoortortani uninngavinni K1-imi K2-milu kiisalu pinasuagassanut immikkoortumi peruluttunut immikkullu nakkutigisarialinnut immikkoortortani peqqissaasutut atorfiit ilaat inuttaqanngillat. 

Tamatuma kingunerisaanik juunip qeqqaniit aggustip tungaanut siniffinnik uninngavissanik matusisoqartariaqarpoq.

- Tamaviaarluta immikkoortortanut sulisussarsiniaraluarpugut ajoraluartumilli tamanna ajornarsimavoq, pilatsittunut immikkoortortami nakorsaanertut pisortaq Knud Erik Kleist oqarpoq. 

Islandimut Danmarkimulluunniit nuutsitsisoqarsinnaasoq

Siniffiit uninngavissat matuneqarnerisa kingunerisinnaavaat, nakorsiat ilaat pinasuartoqartillugu Islandimut imaluunniit Danmarkimut nuunneqarsinnaanerat. Nakorsiat aamma aggersarneqarnissaminnut sivisunerusumik utaqqinerannik kinguneqarsinnaavoq.

- Pisoq ajoraluartumik piffissami sivisuumi ilisimasatsinnik erseqqissaaneruvoq: Napparsimasuutitta nakorsarneqarlutillu paaqqutarineqarnissaannut qulakkeerinissamut, Ilinniarsimasut maani ikippallaarput ikippallaallu Kalaallit Nunaannik Peqqinnissaqarfimmillu soqutiginnipput, Aqutsisoqarfiup pisortaa Malene Marie Nielsen oqarpoq.

Feeriarnerulli nalaani juulip aallaqaataaniit aggustip qeqqata tungaanut Napparsimmavissuarmi immikkoortortani sullissisinnaassutsikkut nalimmassaasarneq tamatumalu nassatarisaanik ass. pilatsittussatut pilersarutaasunik aggesaasoqatanginnera pinasuartariaannaalli navianaatilinnillu nappaatillit kisimik suliarineqartarnerat nakorsaanertut pisortap erseqqissarpaa.

Suli sulisussarsiortut

Napparsimmavissuarmut sulisussarsiniarnerup suli ingerlanneqarnera nalinginnaasumillu aalaakkaasunik sulisoqarnissap sulisussarsiortarnerullu suliniutaanerat, Aqutsisoqarfiup pisortaata nassuiaatigaa.

- Pikkorissarnernut qaffasinnerusumillu ilinniaqqinnernut tunngatillugu ilinniagaqassutsikkullu oqalliffiusuni naapertuuttuni tamani ass. atuagassiani saqqummersitsinernilu takussaanitsigut suliffittut kajungernartuunissarput sapinngisarput tamaat suliniutigaarput. Danmarkimi napparsimmaviit arlallit suleqatigaagut ass. napparsimmavimmi sulisut arlallit atorfimmik ataatsimik avitseqatigiisinnaanerat. Sulisussarsiniarnermut siunnersorteqarpugut Peqqinnissaqarfiup pilerisaarutiginissaa qulakkeerniaannarnagu aammali suliunnaalernermi naliliinernik malitseqartitsinissamut il.il. tunngatillugu. Taamaalilluta suliffittut ilisimasaqarfiginerulerumalluta pisarialinnillu pitsanngorsaasinnaanngorluta, Aqutsisoqarfiup pisortaa naggasiivoq.