Aningasaanut inatsit allannguiffiugiuminaatsoq suliarineqalertoq
Ukiup tullianimut siunnersuut ullumi suliarineqartussaq qinikkat allanngortinniarunikku, taava annertuumik pingaarnersiortariaqassapput.
Inatsisartut ullumi aningaasanut inatsisissatut siunnersuut siullermeerlugu suliarilerunikku ajornaatsuinnaassaanngilaq.
Siunnersuut maanna taamatut isikkoqartillugu sinneqartoorutit 8,6 millionit koruuniinnaapput.
Tamatuma saniatigut aningaasaqarnermut inatsit sinneqartoortussaatitaavoq. Inatsisartuni qinikkat arlaannut amerlanerusumik aningaasaliissuteqartitserusukkunik sipaarniaaffigisariaqassapput, imaluunniit nutaanik akitsuutilersuinikkut isertitaqartariaqassapput.
Ukiormanna nunap aningaasaqarnikkut 7 procentimik siuariarnera atorluarneqarpoq, tamannalu aalisarnermit naatsorsuutigineqanngitsumik isertitaqarluarnermik pissuteqarpoq.
Ineriartorneq aappaagu appariarluni 3-mut 4 procentimut inissinnissaa Aningaasaqarnermut Siunnersuisoqatigiit naatsorsuutigaa.
Aningaasaqarnermut inatsit aamma maanna Inatsisartunut ilaasortanut inuiaqatigiinni aalajangersimasumik pingaarnersiunissaminnut periarfissaat kingulliuvoq. Tassani qinersisoqaqqinnissaa sioqqullugu aningaasanut inatsit una kingulliuvoq.
