Anna Wangenheim: Inissianut akikinnernut innersuussigit
Naalakkersuisut Dronning Ingridip Napparsimmavissuani sulisunut Nuummi Qatserisuni inissianut isumaqatigiissutit nutaat saqqummiukkamikkit, ineqarnermut akiliutit pillugit nalunaaruteqarsimasariaqaraluarput, Demokraatit ilaqutariinnermut peqqissutsimullu oqaaseqartartua, Anna Wangenheim taama isumaqarpoq.
Dronning Ingridip Napparsimmavissuani sulisut 14-it peqqinnissaqarfimmi sulisut kattuffiannut PPK-mut allakkatigut saaffiginnillutik Qatserisuni inissiat attartornerannut akit nutaat naammagittaalliutigaat. Taakkua ilagaat Bea Jeremiassen, inissiamut marlunnik sinittarfilimmut qaammammut 15.000 koruunit missaannik attartornissamut itigartitsisoq.
Taamak allaaserinnippoq aviisi Sermitsiaq.
Demokraatit sinnerlugit Inatsisartuni ilaasortap ilaqutariinnermut peqqissutsimullu oqaaseqartartup Anna Wangenheimip Naalakkersuisut isornartorsiorpai, ineqarnermut akiliutit pillugit siusinnerusukkut nalunaaruteqarsimannginnerat pillugu, isumaqarporlu inissiat allaanerulluinnartumik akeqarnissaat siunertaasimassagaluartoq.
– Siullermik Naalakkersuisut sulisunut inissiat nutaat pillugit isumaqatigiissut saqqummiukkamikku ineqarnermut akiliutit siusinnerusukkut nalunaarutigisimanngimmatigik ilisimasimaneraat. Tamanna sulisunut tupaallaataavoq, ulloq manna tikillugu inissianut quppersakkani akit allaanerulluinnarmata, Anna Wangenheim oqarpoq.
Allaaserisaq tamaat aviisimi Sermitsiami atuaruk.
