Anorthosinik piiaavimmit cementi CO2-mik aniatitsinngitsoq
Hudson Ressourcess Kangerlussuup eqqaaani Naajaani piiaaffissami cementimik CO2-mik aniatitsiffiunngitsumik anorthosit atorlugit ineriartortitsisimavoq.
Pilersaarutit malillugit ingerlasoqassappat, Kangerlussuup eqqaani Naajaani Hudson Ressourcesip piiaavissaa septembarimi ammassaaq. Atortussiaq anorthosit siunertanut amerlasuunut atorneqarsinnaavoq, glasfiberi, qalipaatinut allanullu.
Maannalu aamma allamut atorneqarsinnaalerpoq. Tassami Hudson Ressourcesip University of British Columbia suleqatigalugu cementimik CO2-mik aniatitsinngingajattumik anorthosit atorlugit ineriartortitsisimavoq. Tassani cementi syremut aamma kiammut akiuussinnaassuseqartoq pineqarpoq.
Aamma atuaruk: Hudson Greenlandip sulisuni piginneqataatissinnaajumavai
Portland cementimik tunisassiorneq nalinginnaasoq kissassutsimik qaffasissumik pisariaqartitsivoq, taamaalillunilu nukimmik annertuumik atuilluni. Cementimik tunisassiorneq nunarsuaq tamakkerlugu CO2-mik aniatitsinerup 5 procentianik aniatitsisartoq ilimagineqarpoq.
Anorthosit aserortikkat atorlugit cementimik illup kiassusaanik kiassusilimmik sananissaq iluatsinneqarsimavoq. Taamaalillunilu tunisassiornermut atatillugu CO2-mik aniatitsisoqanngilaq. Taamaattorli anorthosit aserorternerannut aamma angallannerannut atatillugu nukimmik atuisoqarpoq.
- Cementimik qaqortumik mingutsitsinngitsumik ineriartortitsinnaalerneq nuannaarutigisorujussuuarput. Taamatut suliaqarneq anorthosit Naajaaneersup immikkuullarilluinnartumit pisinnaasimavoq, ingerlatseqatigiiffiup pisortaa, James Tuer, nalunaarummi taama allappoq.