Aslak Jensen, oktober 2021-mili KNAPK siulittaasup tulliatut issiasimasoq, siulersuisuunerni  atuuffimminit tunuartinneqarsimavoq.

Pineqartup tamanna tamat attaveqarfiisigut Facebookimi toqqaannartumik nassuiarpaa oqaluttuaralugu KNAPK-mi siulersuisut tamarmiusut aalajangersimagaat siulittaasup tulliatut tunuartinneqassasoq. Tamanna ataasinngornermi unnukkut, Facebookimi toqqaannartumik aallakaatitsinermini isiginnaartorpassuaqarluni oqaluttuaraa.

- Kattuffimmut allamut ilanngunnissara isumaliutersuutigilereerpara. Aamma isumaliortersuutigigaluarpara NAPP-mi siulittaasutut tunuarnissara, uanga pingaartikkakku peqatigiiffimmut kattuffimmi aallartitaqassasoq. Tamannali siulersuisut oqaluuserissammassuk utaqqimaaqqaarpara, Aslak Jensen oqaluttuarpoq. 

Unnerluussinerit sakkortuut

Aslak Jensen immiussami nassuiaavoq KNAPK-mi kingullermik ataatsimeersuartoqarmat siulittaasumik toqqaanissaq siumoortumik isumaqatigiissutigineqarsimasoq.

- Tupigusuutigaara ataatsimeersuarneq ullormik ataatsimik sioqqullugu aallartitat naapimmata, tassanilu aalajangerneqarmat kina siulittaasutut taaneqassanersoq, Aslak Jensen oqarpoq.

Kattuffiup ataatsimeersuarnerani kingullermi ilisimaneqartutut Nikkulaat Jeremiassen siulittaasutut taaneqarpoq, taamaasillunilu Henrik Sandgreen siulittaasuujunnaarsinneqarluni.

Suleqatigiinneq pitsaanngitsoq

KNAPK tusagassiorfinnut nalunaaruteqarluni Aslak Jensenip kattuffimmit tunuartitaanera aamma nassuiarpaa.

Nassuiaatigineqarpoq siulersuisuunerit ataatsimoortut kattuffiup siunertaani anguniagaanilu § 13-mi aalajangersakkap unioqqutinneqarnera tunuartitsisariaqarnermut aallaaviuvoq, tassani Siulersuisuunerit naliliinerat naapertorlugu anguniagaq ataqqineqanngimmat Aslak Jensenimik tunuartitsineq pisimasoq.

- Taamatut pisoqarnera ulluinnarsiutaanngilaq, taamaattumik tunuartitsinissamik aalajangerniarneq imaannaanngilaq. Kattuffiup sulinermini ataatsimoorluni ingerlanissaa pingaaruteqarpoq, aamma ataatsimeersuarnermi anguniakkat timitalerniarlugit sulineq akisussaaffillu nalornisinneqassanngillat, KNAPK-mi siulittaasoq Nikkulaat Jeremiassen tusagassiorfinnut nalunaarummi oqarpoq.

KNAPK nassuiaavoq siulersuisuunerit Aslak Jensenimik suleqateqarniarnertik naammagisimaanngikkaat, inuit qarasaasiakkut naapittarfiini namminissarsiorluni kattuffiup sulinera pillugu saqqummertuartarnera pillugu, tamannalu pitsaanngitsutut isigineqartoq.

Taama iliortarsimaneq oqaatsitigut aamma allakkatigut mianersoqqussutigineqareersimagaluarpoq, iluaqutaanngitsumilli, nassuiaatigineqarpoq.