Assit takukkit: Atuartut imarmi nillertumiittut
Nuuk Internationale Friskolemi atuartut imaani isumannaallisaaneq sungiusarpaat. Pikkorissarneq nuna tamakkerlugu atuarfinnut neqeroorutigineqassaaq.
Nuuk Internationale Friskolemi 8. klassit imaani isumannaallisaanermut pikkorissarnermut nutaamut misiliutaapput, Imarsiornermik Ilinniarfiup tamanna neqeroorutigisalerniarpaa.
Naluttarfik Maliup saavani atuartut tunngaviusumik imaani isumannaallisaanermut arfininngormat pikkorissarnermut peqataammata seqinnerluni qulinik issippoq.
Pikkorissarneq pikkorissaasarfiup immikkoortuani pisortamit, Thomas Bruun de Neerdaardimit, Imarsiornermik Ilinniarfimmeersumit ingerlanneqarpoq.
Meeqqat atuarfiini angajulliit pikkorissartinneqartarnissaannut taanna misiliutaavoq, pikkorissaanermut immikkoortortoqarfik illoqarfinni nunaqarfinnilu imaani suliaqartunut pikkorissartitsigaangat sapinngisamik atuarfinnut neqeroorutigineqartalissaaq.
Klassi illup iluani akunnialunni piareersarlutik sammisaqartinneqareerlutik imaani misiliitinneqarput.
- Inuusuttut imaani isumannaatsuunissaq pillugu ilikkagaqarnissaat pingaaruteqarpoq, ajutoortoqarnerani qanoq iliorsinnaaneq, pingaarnertullu: Imaani nillertumut pigaanni qularnaatsumik toqunissamik isumaqanngitsoq paasinissaa, Thomas Bruun de Neerdgaard oqarpoq.
- Atuartut tamarmik imaanit qaqigami uluaat sinngorlutik qungujulapput. Misigisaat ilikkagaqarnarlunilu nuannerpoq. Sinaakkutit toqqissisimanarmata tamarmik sungiusarnermit imminut tatiginerannik ikinngutigiinnerannillu nukittuallatsitsivoq. Minnerunngitsumillu umiatsiamik angalatillutik ajutuussagaluarunik qanoq iliussanerlutik ilisimasaqalerput, Nuuk Internationale Friskole tusagassiuutinut nalunaarummi allappoq.