Umiarsuaatileqatigiiffiit CO2-mik aniatitsinnginnerunissaannut kajumissaarniarlugit EU akitsuusiinermik nutaamik, Emissions Trading System-imik (ETS) taaneqartartumik, ukioq nutaamiit atuutilersitsiniarpoq.

Royal Arctic Line EU-p nunaanit nunaanullu assartuinermi CO2-mik aniatitsiinnartarniaruni, CO2-mik aniatitsissutissanik pisinissamut pisussaaffilerneqarsimavoq.

Umiarsuaatileqatigiiffik ilisimatitsivoq, ukioq manna CO2-mik aniatitsineq tonsimut 7.500 koruunit missaannik akeqarsimasoq.

Akit nikerarput

- Tuniniakkat pisiaasartullu aallaavigalugit akit aalajangerneqartarput. Aniatitsissutissat killeqanngitsumik niuerutigineqartarmata, 2024-mi qanoq akeqassanersut ilisimaneqanngikkallartoq, Royal Arctic Line nittartakkamini nassuiaavoq.

Umiarsuaatileqatigiiffik ilisimatitsivoq akitsuut nutaaq BAFCAF-ip akitsuutaatut naatsorsorneqartarneratulli naatsorsorneqartarumaartoq. Akiliutaasartussaq januaarip aallaqqaataaniit 1 procentinngortinneqassaaq, qaammatillu tamaasa nalimmassarneqartassalluni.

- CO2-mut akitsuut EU-mut akilerneqartassaaq, taamaattumik akitsuut Royal Arctic Linemut akiliutaasarnavianngilaq, erseqqissarneqarpoq. Akitsuut nutaaq atuisut akiligassaanni takuneqarsinnaalissaaq.

Arriinnerusumik umiartorneq

Atlantikoq ikaarlugu angalanissamut pilersaarut qanittukkut saqqummiunneqarpoq, taannalu Atlantikoq ikaarlugu arriinnerusumik angalasoqarsinnaaneranik periarfissiivoq, tamannalu ikummatissanik annikillisitsisussaassaaq. Royal Arctic Linep umiarsuaataasa nutarterneqarneranut atatillugu nukissiutinik sipaarniarluni teknologii atulersinneqassasoq, aamma ilisimatitsissutigineqarpoq.

Royal Arctic Line 2024-mi assartuinermi akigititanik qaffaanissani pillugu saqqummiussimmat qaammat ataaseq qaangiutilerpoq, tamannalu ilaatigut Sulisitsisunit isornartorsiorneqarpoq. 2024-mi atlantikoq ikaarlugu assartuinermi akigititat 6,4 procentimik qaffassapput. 2025-mi 3,1 procentimik aappaaguanilu 2,2 procentimik qaffassallutik.