Atuakkiortoq oqallitsitsisartorlu spiralilersuisimaneq pillugu pinerluttulersarummik atuakkiortoq
Nunatsinni aalassaatigineqaqisoq oqallisaaqisorlu, spiralilersuisimaneq, pillugu atuakkiortoq oqallitsitsisartorlu, Nauja Lynge pinerluttulersaarummik saqqummersitsiniarpoq.
Nunatsinni akuerseqqaarani spiralilersuisimaneq siornaak 2022-imi saqqummertoqarpoq, maanna atuakkiami aapaagu saqqummersussatut pilersaarutigineqartumi pingaarnertut sammineqarpoq.
Nauja Lyngep, Kalaallit Nunaanni Danmarkimilu oqallisissiortartutut atuakkiortartutullu ilisimaneqartup, spiralilersuisimaneq pinerluttulersaarusiaralugu atuakkiariniarpaa "Grønlandseksperimentet"-imik qulequtaqartillugu.
Anniarneq isumassarsiorfigalugu
Atuagaq saqqummersitsivik Forlaget Alhambra aqqutigalugu aappaagu januaarimi saqqummerissineqassaaq.
- Kalaallit Nunaanni spiralilersuisimaneq killitsissutigeqaara. Kalaallit Nunaanni misileraanermi kalaallit qallunaat kostskolianni atuartunut aamma taama pisoqarnikuuvoq. Niviarsiaqqat inuiaassuertik pillugu toqqarneqarsimanerat amiilaarnartuuvoq. Danmarkimi kalaaliuninni nammineq anniarnera isumassarsiorfigaara. Taassuma saniatigut aamma kalaallit arnat sapiitsut oqaluttuassartaat oqaluttuarissavara, Nauja Lynge oqaluttuarpoq.
Kalaallit niviarsiarartaat 1960-kkunni 1970-kkunnilu akuerseqqaaratik angajoqqaajusulluunnii akuersiseqqaarnagit naartunaveersaasersorneqarsimanerat siorna 2022-imi saqqummeqqaarmata nutaarsiassani sammineqangaarsiarput.
Maanna akuersiteqqaarnagit naartunaveersaasersorneqarsimasut eqqartuussivilersuussipput.
Aaqqissuisoq nuannaartoq
Nauja Lyngep atuakkiaminik saqqummersitsissamaarnera, Vibe Skyttemit, naqiterisarfimmi Alhambrami aaqqissuisuusup nuannaarutigaa.
- Nauja Lynge Alhambrami atuakkiortutut ilanngussinnaagatsigu tulluusimaarutigeqaarput. Pinerluttulersaarummik atuakkiaq pitsaasoq pinerlunnermik paasiniaanermillu oqaluttuaannaanngilaq pissanganartoq, aammali inuiaqatigiinnik isornartorsiuisarpoq inuiaqatigiinnilu ajornartorsiutit erseqqissartarpai.
Nauja Lynge 1965-imi inunngorpoq Kalaallillu Nunaanni peroriartorluni. Kalaallimik ataataqarpoq, arnaalu qallunaajulluni. Inersimasutut inuunermi annersaa Danmarkimi najugaqarpoq. Aarhusimi najugaqarluni immikkut atuakkiortarpoq oqalugiartartarlunilu siornatigullu Jyllands-Postenimut isummersortarluni. Niels Ebbesen Medaljenimik 2019-imi nersornaaserneqarpoq.